Áýesqoı bokstan álem chempıony (81 kılogramm) Bekzat Nurdáýletov kásipqoı boksqa bet burǵanymen, ázirge ulttyq quramadan ketýge nıetti emes, dep habarlaıdy Egemen.kz.
«Men jyldyń sońyna deıin ulttyq quramanyń sapyndamyn. Odan keıin qalaı bolatynyn federasııa basshylyǵy jáne bapkerlermen keńesip sheshe jatarmyz. Kásipqoı boks áleminde júrgen sportshylarǵa 15 jekpe-jek ótkizgenge deıin áýesqoı boksta baq synaýǵa múmkindik qarastyrylǵan. Ol múmkindikti de múlt jiberýge bolmas.
Men aldaǵy shaıqastardyń birinde qurlyqtyq belbeýlerdiń birin jeńip alsam deımin. Odan keıin de bıikterdi baǵyndyryp, jankúıerlerdi qýantqym keledi. Álbette, kásipqoı bokstyń Mekkesi AQSh ekenin eldiń bári biledi. Túptiń túbinde sonda baryp, joǵary jetistikterge jetýge kúsh salamyn», deıdi ol.