Endi jańa týǵan nárestege beriletin járdemaqyny alý úshin elektrondy túrde ótinish berip, onlaın rásimdeýge bolady. Bul jaıly Sıfrlyq damý, ınnovasııalar jáne aeroǵarysh ónerkásibi mınıstrligi habardar etip otyr.
– Biz memlekettik kórsetiletin qyzmetter servısiniń aıasyn keńeıte otyryp, olardy tanymal qosymshalarǵa shyǵarýda belsendi jumys júrgizip jatyrmyz. Osylaısha kórsetiletin qyzmetterdi halyqqa yńǵaıly tásilmen qoldanýdy tańdaý múmkindigin usynýǵa tyrysýdamyz. Qazirgi ýaqytta jeke kásipkerdi tirkeý men kólikti qaıta tirkeýdi bank qosymshalary arqyly júzege asyrýdamyz. Sondaı-aq qazir jańa týǵan nárestelerge járdemaqyny smartfon arqyly rásimdeýge bolady, – deıdi Sıfrlyq damý, ınnovasııalar jáne aeroǵarysh ónerkásibi vıse-mınıstri Áset Turysov.
Eńbek jáne halyqty áleýmettik qorǵaý mınıstriniń orynbasary Erbol Ospanovtyń aıtýynsha, birlesken qanatqaqty jobany iske asyrýdyń maqsaty – túpki paıdalanýshyǵa barynsha qolaıly jaǵdaı jasaý.
– Bul shara azamattardyń kórsetiletin memlekettik elektrondy qyzmetterge degen senimin arttyrady dep oılaımyz. О́z kezeginde, biz ekinshi deńgeıli banktermen qyzmetterdiń aýqymyn ulǵaıtý jáne sapasyn jaqsartý maqsatynda ári qaraı yntymaqtastyqqa daıyn ekenimizdi bildiremiz, – deıdi ol.
Bala bir jasqa tolǵanǵa deıin onyń kútimine baılanysty kirisinen aıyrylý jaǵdaıyna baılanysty taǵaıyndalatyn áleýmettik járdemaqyǵa ótinimdi Halyk Homebank pen Kaspi.kz mobıldi qosymshalary arqyly berýge bolady. Bul úshin memlekettik kórsetiletin qyzmetter bólimine kirip, derbes derekterdi jınaýǵa jáne óńdeýge kelisimdi rastaý qajet. Odan keıingi qadam – «Balanyń týýyna járdemaqy» bólimin jáne ótinish beriletin balanyń derekterin tańdaý. Keıin barlyq derekterdi tekserip, ESQ arqyly ótinimge qol qoıasyz.
Klıent ótinimdi jiberip, ony memlekettik organ qaraǵannan keıin klıentke PUSH habarlamasy joldanady jáne ótinishtiń qaraý nátıjesi men taǵaıyndalǵan járdemaqy kólemi týraly SMS jiberiledi. Kórsetiletin qyzmet túrine ótinishti bala týǵannan bastap bir jyl ishinde kez kelgen ýaqytta joldaýǵa bolady.
«О́tinishti aldyn ala HQO, elektrondy úkimet portaly arqyly nemese 1414 nómiri arqyly SMS servıspen berýge boldy. Bul qyzmet joǵaryda atalǵan servıster boıynsha kórsetiletin eń tanymal qyzmetterdiń biri sanalady jáne turǵyndar arasynda suranysqa ıe. 2021 jyly HQO arqyly shamamen 344 134, eGov.kz portaly arqyly 144 751 jáne «1414» SMS qyzmeti arqyly 209 351 ótinim berildi. Qazirgi ýaqytta Halyk Homebank pen Kaspi.kz yńǵaıly servısterimen ıntegrasııalaýdyń nátıjesinde 500-den astam ótinim sátti qabyldandy. Qazirgi kezde kórsetiletin qyzmetke Kaspi.kz mobıldi qosymshasynda iOS men Android qoldanýshylary úshin jáne Halyk Homebank mobıldi qosymshasynda Android qoldanýshylaryna qoljetimdilik bar, iOS júıesinde jaqyn arada paıda bolady» delingen mınıstrliktiń habarlamasynda.