Kókshetaýda sıntetıkalyq esirtki satýmen aınalysqan erli-zaıypty ustaldy, dep habarlaıdy Egemen.kz.
Aqmola oblysy PD Esirtki qylmysyna qarsy is-qımyl basqarmasynyń qyzmetkerleri Kókshetaý qalasynyń Temirjolshylar parki aýdanynda esirtki qoıyp ketýmen aınalysqan 24 jastaǵy er adamdy jáne onyń 22 jastaǵy súıiktisin ustady.
Qyz ben jigit esirtkiniń kezekti partııasyn jasyrý ornyn uıymdastyrý kezinde ustaldy. Er adamdy jeke tintý kezinde belgisiz zat salynǵan 27 paket tabyldy jáne tárkilendi (boljam boıynsha «a-PVP» pırovaleronynyń qurylymdyq analogy sıntetıkalyq esirtkisi). Qyzdan esirtki salynǵan oryndy sýretke túsirý jáne geolokasııa túrinde ornalasý ornyn jiberý kezinde qoldanylatyn telefon tárkilendi.
Sondaı-aq saıabaq aýmaǵyn tekserý barysynda ustalǵandar ózderi esirtki qoıyp úlgergen jasyryn oryndardy kórsetti, osyǵan uqsas 3 túıinshek tárkilendi.
«Ustalǵandar kórshi oblystan kelip, jaqynda esirtki jasyrýshy bolyp jumysqa ornalasqanyn, ınternet arqyly habar alysqan belgisiz adamnan esirtki alǵanyn aıtty. Olar bar bolǵany 10 kún jumys istep, quqyq qorǵaý organdarynyń qolyna tústi», dedi Aqmola oblysy PD Esirtki qylmysyna qarsy is-qımyl basqarmasynyń bastyǵy Meıram Japbasov.
Ustalǵandarǵa qatysty QR QK 296-baby 2-bóligi boıynsha sotqa deıingi tergeý bastaldy.