Aqparat jáne qoǵamdyq damý vıse-mınıstri Bolat Tilepov Túrkistanda ótip jatqan ÁMEN kınofestıvalinde «Qazaqfılm» kınostýdııasy janynan «Qazaq anımasııa» shyǵarmashylyq birlestigi jumysyn bastaıtynyn málimdedi, dep habarlaıdy Egemen.kz.
– Anımasııa óneri arqyly óskeleń urpaqty tárbıeleý – ulttyq «Rýhanı jańǵyrý» jobasynyń mańyzdy mindetteriniń biri. О́zderińizge málim, alǵashqy qazaq mýlttýyndysynyń jaryq kórgenine bıyl 54 jyl toldy. Osy ýaqyt ishinde ulttyq anımasııanyń jetken jetistigi de, kóterilgen bıigi de az emes. Eń bastysy, talaı talanttar ósip, ulttyq mektep qalyptasty. Dese de, zaman kóshi ilgeri ketýde. Oǵan ilesý úshin bizdiń elimizde barlyq múmkindik bar. Bilimi men biligi mol shyǵarmashyl jastar, mamandyq násibin paıdaly kásipke aınaldyrǵan jekemenshik stýdııalar, jańa ıdeıalar men tyń bastamalar jáne, eń bastysy, osy eńbekti tutynýǵa daıyn ulan-ǵaıyr el, jasampaz aýdıtorııa bar, – dep atap ótti vıse-mınıstr.
Bolat Tilepov óz sózinde memlekettik tapsyrysty tııanaqty retteıtin, maqsatty jumsaıtyn júıe joq ekenin alǵa tartty. Vıse-mınıstr sol sebepti anımasııamen aınalysatyn shyǵarmashylyq toptardy qoldaýdyń jańa júıesi paıda bolatynyn habarlady.
– Sondyqtan da kelesi jyldan bastap, jańadan qabyldanǵan ulttyq joba aıasynda «Qazaqfılm» kınostýdııasy janynan «Qazaq anımasııa» shyǵarmashylyq birlestigi óz jumysyn bastaıtyn bolady. Onyń negizgi mindeti – ulttyq anımasııa naryǵynda júrgen shyǵarmashyl toptarǵa bir ortalyqtan qoldaý bolyp, otandyq ónimniń órisin keńeıtý úshin jaǵdaı jasaý. Ekinshiden, anımasııa ónerin tek balalar kontenti retinde emes, kıno men jarnamanyń, kompıýterlik oıyndar men veb-kommýnıkasııa tiline aınaldyrý arqyly tolyqqandy ulttyq aqparattyq resýrs qalyptastyrý. Úshinshiden, árıne álemdik mýltındýstrııa ókilderi men onyń ishinde búgingi festıvalge qatysyp otyrǵan sheteldik áriptestermen de tyǵyz baılanys ornatyp, qazaq anımasııasyn halyqaralyq dárejege kóterý, – dedi B.Tilepov.
Eske salsaq, 29-30 qazan kúnderi Túrkistanda Qazaqstan, Ázerbaıjan, Bashqurtstan (RF), Qyrǵyzstan, О́zbekstan, Tatarstan (RF), Tájikstan men Túrkııanyń bilikti mýltıplıkatorlaryn bir alańǵa jıǵan ÁMEN anımasııalyq kınofestıvali ótip jatyr.