Qaǵaz qujattardyń dáýreni ótip barady. Bul – zańdy da. Birinshiden, jahandyq sıfrlandyrý úrdisine der ýaqytynda qosylǵan abzal. Ekinshiden, memlekettik qyzmetti elektrondy formatta alý azamattardyń ýaqytyn únemdeıdi. Júıkesin de. 2020 jyly onlaın formatqa kóshirilgen qyzmetter sany 83 paıyzǵa ósipti. Sıfrlyq damý mınıstrliginiń málimetine súıensek, qazir qyzmetterdiń 90 paıyzyn úıden shyqpaı-aq alýǵa bolady.
Ranking portalynyń jazýynsha, memlekettik qurylymda eń belsendi sıfrlandyrylǵan júıe – biryńǵaı jınaqtaýshy zeınetaqy qorynyń qyzmetteri. Qazir qor qyzmetiniń 90 paıyzyn onlaın túrde tutynýǵa bolady.
«COVID-19 pandemııasyna baılanysty týyndaǵan qıyn jaǵdaı jáne zeınetaqy júıesiniń qatysýshylar bazasynyń keńeıýi jyldan-jylǵa BJZQ qyzmetterin avtomattandyrý ózektiligin arttyra tústi. 1 qazandaǵy jaǵdaı boıynsha salymshylardyń ındıvıdýaldy zeınetaqy shottarynyń (IZSh) sany 11,5 mln-ǵa jetti. Byltyrǵy kórsetkishten 0,5 paıyzǵa kóp. Jalpy, sońǵy bes jylda IZSh sany 16,4 paıyzǵa kóbeıgen. Bıyl kórsetkishtiń ósýi salymnyń barlyq túri boıynsha baıqalyp otyr. Ásirese, erikti zeınetaqy jarnasy segmentindegi ósim joǵary (+25,9 paıyz). Odan keıingi oryndarda kásibı zeınetaqy jarnasy (+5,2 paıyz) men mindetti zeınetaqy jarnasy (+0,2 paıyz) ornalasqan» dep jazady Ranking.
Pandemııa qıyndyqtaryna qaramastan qor bıyl 9 aıda óz salymshylaryna 30,3 mln qyzmet kórsetipti. Bul – byltyrmen salystyrǵanda 45,8 paıyzǵa joǵary kórsetkish. Sonyń ishinde 22,2 mln (73,2 paıyz) qyzmet onlaın formatta usynylǵan. 2020 jylmen salystyrǵanda onlaın qyzmetter tanymaldylyǵy 71,2 paıyzǵa ósken.
Salymshylar saıt jáne mobıldi qosymsha arqyly kez kelgen ýaqytta túrli qyzmetterdi ala alady. Sonyń ishinde jeke zeınetaqy shotynyń úzindi kóshirmesin alý, óz rekvızıtterine ózgeris pen tolyqtyrý engizý, jeke zeınetaqy shotynyń bar ekeni týraly anyqtama alý, tólemder boıynsha mártebesin tekserý sııaqty tanymal qyzmetter bar.
«Sonymen qatar avtomatty formatta 5,1 mln qyzmet kórsetildi. Oǵan jeke zeınetaqy shotyn avtomatty túrde ashý da kiredi. Máselen, eger jeke tulǵada BJZQ-da ashyq jeke zeınetaqy shoty bolmasa onda ol alǵashqy jarnany salǵannan keıin shot avtomatty túrde ashylady. 2021 jyldyń 26 qazanynan bastap jeke zeınetaqy shotyn avtomatty túrde ashý boıynsha zańǵa ózgerister engizildi. Sondaı-aq qorda jekelegen zeınetaqy qyzmetterin de jeke kýálikti kórsetpeı-aq alýǵa múmkindik bar. Ol úshin eGovMobile mobıldi qosymshasynda qujattyń sıfrly nusqasy bolsa jetkilikti» dep jazady portal.
Qazirgi kezde Google Play servısiniń «qarjy» kategorııasynda BJZQ mobıldi qosymshasy TOP-10 qataryna kiredi.