Qazaqstan Prezıdenti kórnekti memleket jáne qoǵam qaıratkeri Temirhan Dosmuhambetovtiń otbasyna kóńil aıtý jedelhatyn joldady, dep jazady Egemen.kz.
«Týrızm jáne sport mınıstri, Prezıdenttiń Is Basqarmasynyń basqarýshysy, Elorda ákimi laýazymdaryn abyroımen atqaryp, iskerlik qabiletin tanyta bildi. Árdaıym ózine júktelgen mańyzdy mindetterdi úlken jaýapkershilikpen oryndady. Sondaı-aq Ulttyq Olımpıada komıtetiniń jetekshisi retinde otandyq sport salasynyń órkendeýine sińirgen eńbegi óte mol. Sońǵy jyldary kásipkerlikti jańa deńgeıge kóterýge atsalysyp, aýyl sharýashylyǵyn ǵylymı turǵyda damytýǵa zor úles qosty. Áriptesteri men zamandastarynyń ortasynda syıly boldy. Temirhan Myńaıdarulynyń jarqyn beınesi halqymyzdyń jadynda máńgi saqtalady. Marqumnyń jany jánnatta, ımany salamat bolsyn», dep jazylǵan Memleket basshysynyń jedelhatynda.