2021 jylǵy 1 qarashada Glazgo qalasynda Klımattyń ózgerýi týraly BUU negizdemelik konvensııasy taraptarynyń 26-shy konferensııasynda Ortalyq Azııa pavılonynyń resmı ashylýy ótti, dep habarlaıdy Egemen.kz.
Halyqaralyq jasyl tehnologııalar jáne ınvestısııalyq jobalar ortalyǵy baspasóz qyzmetiniń málimetinshe, qazaqstandyq taraptan Halyqaralyq jasyl tehnologııalar jáne ınvestısııalyq jobalar ortalyǵy dırektorlar keńesiniń tóraǵasy Danııar Erenchınov quttyqtaý sóz sóıledi, ol klımat jáne tómen kómirtekti damý salasyndaǵy maqsattarǵa qol jetkizý úshin Ortalyq Azııa elderiniń kúsh-jigerin biriktirýdiń mańyzdylyǵyna toqtaldy.
«Búgin Glazgoda Ortalyq Azııa elderiniń ortaq úıi ashyldy. Bul úıde biz búgin jahandyq klımattyq konferensııa aıasynda búkil álemge ózimizdiń klımattyq kún tártibimiz jáne elderimizdiń biryńǵaı ustanymy týraly aıtyp berý úshin jınalyp otyrmyz. Sondaı-aq, bul bizdiń óńirdegi kórshi elder arasynda ozyq tájirıbe almasý alańyna aınalmaq», dep naqtylady Erenchınov.
Ortalyq Azııa elderi úshin aldaǵy konferensııa tarıhı iz qaldyrmaq, sebebi olar alǵash ret biryńǵaı shoǵyrlandyrylǵan óńirlik málimdememen sóz sóıleıdi. Negizgi habar Ortalyq Azııa memleketteriniń úkimetterine óńirdegi klımattyq daǵdarystyń aldyn alý jónindegi ulttyq jáne óńirlik baǵdarlamalardy kúsheıtýge shaqyrýdan turady.
Eske sala ketsek, Glazgoda ótip jatqan klımattyń ózgerýi jónindegi 26-shy konferensııa álemdik aýqymdaǵy eń mańyzdy oqıǵa bolyp tabylady, onyń jumysyna álemniń 100-den astam memleket jáne úkimet basshylary qatysady.