Onlaın rejıminde ótken apparattyq keńeske qatysýshylar «Abaı» shahtasynda qaza tapqan kenshilerdi bir mınýt únsizdikpen eske aldy. Shahtadaǵy jumystar apattyń mán-jaıy tolyq anyqtalǵanǵa deıin toqtatyldy. Qazir «ArselorMıttal Temirtaý» AQ-nyń barlyq shahtasynda tekserý júrip jatyr, dep habarlaıdy Egemen.kz.
Qaraǵandy oblysynyń ákimi Jeńis Qasymbek qalalar men aýdandar ákimderine oblystyń barlyq ónerkásiptik kásiporyndarynda eńbek qaýipsizdigin jappaı tekserý júrgizýdi tapsyrdy. Bul máselege barynsha jaýapty qarap, nemquraıdylyqqa jol bermeý kerektigin qadap aıtty.
Eske sala keteıik, keshe «Abaı» shahtasynda kenetten metan tarady. Alty shahtıor qaıtys boldy, ekeýi aýrýhanada jatyr. Jeńis Maralbaevty jansaqtaý bóliminen bólimshe palatasyna aýystyrdy, Elaıdyn Zeınalovty da palataǵa aýystyrýǵa daıyndaýda.
Qaza tapqandar men zardap shekkenderdiń otbasylaryna barlyq qajetti kómek kórsetiledi. Másele oblys ákiminiń jeke baqylaýynda.
«Oblys ákimdiginiń atynan qaza bolǵandardyń týystary men jaqyndaryna qaıǵyryp kóńil aıtamyn. Keshe biz marqumdardyń otbasylaryna bardyq. Osy qıyn-qystaý kúnderde oblystyń barlyq turǵyndary sizdermen qaıǵy-qasiretti bólisedi», dedi Jeńis Qasymbek.