Almaty oblysy PD tabıǵatty qorǵaý polısııasynyń qyzmetkerleri Balqash-Alakól oblysaralyq basseındik balyq sharýashylyǵy ınspeksııasynyń qyzmetkerlerimen birlesip «Brakoner» jedel aldyn alý is-sharasyn ótkizip jatyr. Reıd kezinde bir tonnaǵa jýyq zańsyz aýlanǵan balyqty tıep alǵan kólikti ustady. Júrgizýshide balyq aýlaý jáne tasýǵa qatysty ózimen birge eshqandaı qujattary bolmaǵan, dep habarlaıdy Egemen.kz.
«Jedel aldyn alý is-sharasy barysynda polısııa qyzmetkerleri «Mersedes-Bens Sprınter» markaly avtokólikti toqtatty. Kóliktiń ishin tekserý kezinde jalpy salmaǵy bir tonnaǵa jýyq túrli balyq tabyldy», dep habarlady Almaty oblysy PD JPQB TQT ETJ aǵa ınspektory, polısııa maıory Serik Baıǵozınov.
Alynǵan balyq arnaıy qabyldaý ornyna tapsyryldy, al is boıynsha materıaldar odan ári sotqa berý jáne zań sheńberinde tıisti sheshim qabyldaý úshin Balqash-Alakól oblysaralyq basseın ınspeksııasyna berildi.
«Jalpy esepteýler boıynsha atalǵan kólik quralynan 14 kg kókserke, 21 kg-dan astam sazan balyǵy jáne 800 kg-ge jýyq taban jáne ózge de balyqtar tabylǵan. Tabıǵı resýrstarǵa keltirilgen zııan somasy 523 myń 163 teńgeni qurady. Al 38 jastaǵy kúdikti óz kezeginde kinásin tolyq moıyndady», dedi maıor Baıǵozınov.