Oralda reseılik tirkeýdegi kóligi bar júrgizýshiler Abaı alańyna jınaldy, dep habarlaıdy Egemen.kz.
Jergilikti bılik beıbit jıyndar aldyn ala eskertilgennen keıin ótýi kerek ekenin túsindirdi.
BQO jáne qala ákimdikteri mańyndaǵy alańǵa 50-ge jýyq adam jınalǵan. Halyqpen kezdesýge BQO jáne Oral qalalary ákimdigine qarasty basqarma men Ishki saıasat bólimi ókilderi shyqty. Júrgizýshilerge beıbit jıyndardy ótkizý tártibi túsindirildi. Keıin jurtshylyq Oral qalasy ákimdiginiń úlken zalyna shaqyryldy.
Tártip saqshylary málimetinshe, jol-kólik oqıǵalarynyń jartysyna jýyǵyn shetelde tirkelgen kólik júrgizýshileri jasaǵan.
«Bıylǵy 10 aıda shetelde tirkelgen kólik júrgizýshileri 89 jol-kólik oqıǵasyn jasap, onyń saldarynan 32 adam qaza taýyp, taǵy 122-si jaraqat alǵan. 1400 jol-kólik oqıǵasy zalal keltirgen», dedi BQO IID Jergilikti polısııa qyzmetiniń basshysy Merhat Ájenov.
Buǵan deıin Qazaqstanda Reseıde tirkelgen nemese elimizde tirkelmegen kólikterdi jappaı tekserý bastalǵany habarlanǵan edi. Mundaı kólikter sany 88 myń bolsa, onyń 9 myńy BQO-da. BQO polıseıleri tekserý bastalǵannan beri turaqqa 39 kólik alynǵanyn, onyń 21-i aıyppul tólengennen keıin ıesine qaıtarylǵanyn qosty. Biraq mundaı kólikterdi polısııaǵa tirkeý kerek.
Eske salaıyq, qazir reseılik tirkeýdegi kólikter quqyq qorǵaý organdarynyń jiti baqylaýynda. Qazaqstan Respýblıkasynyń Ishki ister mınıstrligi Reseı Federasııasynan ákelingen 88 myń avtokólikke qatysty jaǵdaı Reseı Federasııasynan kólik satyp alǵan, biraq olarǵa quqyqty zańdastyrmaǵan qazaqstandyqtardyń áreketinen týyndaǵanyn basa aıtty.