Soltústik Qazaqstan oblysynyń polıseıleri bes aıǵa sozylǵan «Qarasora» jedel aldyn alý is-sharasynyń qorytyndysyn shyǵardy, dep habarlaıdy Egemen.kz.
Polısııa departamenti baspasóz qyzmetiniń málimetinshe, operasııanyń basty maqsaty - esirtki quraldary men psıhotroptyq zattardyń zańsyz aınalymy faktilerin anyqtaý, jabaıy qarasorany zańsyz jetkizý arnalaryn jabý.
Oblystyq polısııa qyzmetkerleri osy saladaǵy 125 zań buzýshylyqty anyqtady. Onyń ishinde esirtkini ótkizýdiń 47 faktisi bar.
Máselen, osyndaı esirtki satýshylarynyń biri Petropavl qalasynyń ortalyǵynda ustaldy. Jambyl aýdanynyń 39 jastaǵy turǵynyn polıseıler maqsatty túrde izdestirdi. Onyń «Subaru Legacy» kóliginen bes kılogramm marıhýana bar polımerli paket alyndy. Ustalǵan adam eki jyl boıy esirtki qoldanǵanyn jáne ony basqalarǵa da satqanyn moıyndady. Sot sheshimi boıynsha ol 10 jylǵa bas bostandyǵynan aıyryldy.
«Bes aı ishinde zańsyz aınalymnan 295,5 kg astam túrli esirtki quraldary tárkilendi. Jyl basynan beri - 409,5 kg, onyń ishinde 4,2 kg-nan astamy «sıntetıka» jáne 4,1 kg «gashısh». Esirtki bıznesi salasynda 195 túrli qylmys anyqtaldy. Onyń 49-y esirtki ótkizý, 15-i asa iri kólemde saqtaý faktileri», dedi Polısııa departamenti bastyǵynyń orynbasary Rýslan Nazarov.