Soltústik Qazaqstan oblysyndaǵy avtojolda qıyrshyq tas artqan KamAZ júk kóligi aýdarylyp, órtendi, dep habarlaıdy Egemen.kz.
Búgin Taıynsha aýdany Obýhovka eldi mekeni mańyndaǵy avtojolda KamAZ aýdarylyp, kóliktiń kabınasynan órt shyqty. Jol-kólik oqıǵasy beınelengen vıdeo áleýmettik jelide jarııalandy.
Apatqa kóktaıǵaq sebep bolǵan. Búgin túnde SQO-da qalyń qar jaýyp, onyń arty kóktaıǵaqqa ulasqan edi. SQO tótenshe jaǵdaılar departamenti baspasóz qyzmetiniń málimetinshe, oqıǵa jaıynda búgin saǵat 9:56 mınýt ketkende habar túsken. Qońyraý shalǵandar «Nur-Sultan-Petropavl» avtomobıl jolynda KamAZ kóliginiń aýdarylyp, janyp jatqanyn aıtqan. Kómekke jaqyn mańdaǵy Kellerovka eldi mekeniniń órt sóndirýshileri jetti. Oqys oqıǵadan zardap shekkender joq.
Jol-kólik oqıǵasy jaıynda SQO polısııa departamenti de túsinik berdi. Mamandardyń aıtýynsha, qolaısyz aýa raıyna baılanysty júrgizýshi rýlge ıe bola almaı, kóliktiń aýdarylyp qalýyna jol bergen. Sonyń saldarynan júk kóliginen ot shyqqan.