Qazaqstan Respýblıkasy Syrtqy ister mınıstrliginiń resmı ókili Janbolat Úsenov BAQ ókilderiniń aldynda málimdeme jasady. Onda ol 2014 jylǵy 23 aqpan kúni Máskeýde Reseı Lıberal-demokratııalyq partııasy (RLDP) fraksııasynyń tóraǵasy, Reseı Federasııasy Memlekettik keńesiniń múshesi Vladımır Jırınovskıı mıtıngte sóz sóıleı otyryp, Ortalyq Azııa memleketterin, sonyń ishinde Qazaqstandy Reseı Federasııasynyń quramyna kirgizýge shaqyrǵanyn atap kórsetti.
Jırınovskıı resmı tulǵa, RF Memlekettik Dýmasynyń depýtaty, iri saıası partııanyń basshysy bolyp tabylady. Bizdiń pikirimizshe, osyndaı joǵary memlekettik laýazymdarǵa ıe adam óziniń kópshilik aldynda jasaıtyn málimdemelerine úlken jaýapkershilikpen qaraýy tıis. Onyń ústine, bul saıasatker bizdiń elimizge qatysty jol berilmeıtin málimdemelerdi birinshi ret aıtyp otyrǵan joq.
Biz osyǵan deıin birneshe ret málimdegendeı, Qazaqstannyń egemendigi, táýelsizdigi men terrıtorııalyq tutastyǵyna qol suǵýǵa jol berilmeıdi jáne mundaı áreketter Qazaqstannyń memlekettik organdary tarapynan sheshimdi túrde jaýap alatyn bolady.
Osyǵan oraı, biz RF Syrtqy ister mınıstrligi atyna resmı nota ázirledik. Onda biz reseılik tarapty Qazaqstan men Reseı arasynda qalyptasqan odaqtastyq rýh pen strategııalyq áriptestik qarym-qatynasyna Jırınovskııdiń sózderi qanshalyqty sáıkes keletinine resmı baǵa berýin suradyq. Qazirgi tańda QR Syrtqy ister mınıstrligi Jırınovskııge qatysty dıplomatııalyq sıpattaǵy arnaıy sharalardy qoldaný múmkindigin qarastyrýda, dedi ol.