Oblystyń sharýalary tótenshe jaǵdaı jarııalaý týraly talap qoıyp otyr, dep habarlaıdy Egemen.kz mangystaumedia.kz-ke silteme jasap.
О́ıtkeni, qystyń qahary óńirde asha tuıaq mal qaldyrmaýy múmkin deıdi. Tótenshe jaǵdaı jarııalanyp, memleketten kómek berilse, óńirdegi qalǵan mal basyn aman alyp qalýǵa bolady degen pikirde.
- Eń bolmasa mal azyǵynyń qazirgi qunyn 50-60 paıyzǵa arzandatyńdarshy dedik. Nemese, óńirde munaı isimen aınalysyp otyrǵan kompanııalar kómek kórsetsin, bizdiń jerimizdi paıdalyp otyr ǵoı. Olar da kómek bersin. Jem men shóptiń baǵasy endi túspeıtin bolsa, munaı kompanııalary 50 paıyzyn tólesin, - deıdi sharýa Ádilbek Saǵyndyq.
Sonymen qatar, qudyq qazý men jaıylym jáne shabyndyq jerlerdi durys ıgerýge kóńil bólinse deıdi. Odan bólek, Mańǵystaýdyń jaby jylqysyn jáne túıesin asyl tuqymdy mal qataryna engizip, zańnamalarda kórsetilgen túrli kómekter berilsin dep otyr.
- Sharýa qojalyqtarynda Mal azyǵy da tapshy ekenin kórip otyrmyz. Mal azyǵy nashar bolǵandyqtan maldyń da kúıi, qundylyǵy óte tómen. Biraq oǵan qaramastan úkimet tarapynan kómek kórsetilip jatyr, - dedi Mańǵystaý oblysy aýyl sharýashylyq basqarmasynyń basshysy Qazbek Táshimov.
Qazbek Táshimov jýyrda ǵana oblystyń aýylshaýarýashylyǵy basqarmasyna basshy bolyp taǵaıyndaldy. Aıtýynsha, dál qazirgi ýaqytta qysqy mal azyǵy úshin 68 myń tonna shóp, 30 myń tonnadan astam jem qory daıyn tur deıdi ol.