QR Densaýlyq saqtaý mınıstrligi «Pılottyq rejımde Qazaqstan Respýblıkasynda tandemdi mass-spektrometrııa ádisimen almasýdyń tuqym qýalaıtyn aýrýlaryna neonataldyq selektıvti skrınıng júrgizý boıynsha pılottyq jobany engizý týraly nusqaýlyqty bekitý týraly» buıryq jobasyn daıyndady, dep habarlaıdy Egemen.kz.
Nusqaýlyq tandemdi mass-spektrometrııa ádisimen almasýdyń tuqym qýalaıtyn aýrýlaryna neonataldyq selektıvti skrınıngti jańa týǵan náresteniń neonataldyq skrınıngi baǵdarlamasyna engizýdiń oryndylyǵyn anyqtaý maqsatynda ázirlendi.
Tuqym qýalaıtyn aýrýlarǵa neonataldyq selektıvti skrınıng júrgizý jónindegi pılottyq jobaǵa Densaýlyq saqtaý mınıstrligi aıqyndaǵan medısınalyq uıymdar men zerthanalar qatysady.
Pılottyq jobany iske asyrýdyń úılestirýshisi «Pedıatrııa jáne balalar hırýrgııasy ǵylymı ortalyǵy» AQ bolyp tabylady.
Pılottyq jobany 2022 jylǵy 1 qańtardan bastap 2022 jylǵy 30 maýsymǵa deıin iske qosý josparlanyp otyr.
«NBO-ǵa selektıvti skrınıng pılottyq jobaǵa qatysatyn medısınalyq uıymda stasıonarlyq emdelýde júrgen 0-den 28 kúnge deıingi jańa týǵan nárestelerde júrgiziledi», delingen qujatta.
Jańa týǵan balanyń qan úlgilerin tandemdi mass-spektrometrııaǵa jiberý týraly sheshimdi pılottyq jobaǵa qatysatyn medısınalyq uıym mamandarynyń konsılıýmy qabyldaıdy.
Taldaý nátıjeleri qan úlgilerin jibergen medısınalyq uıymǵa beriledi.
Pılottyq jobaǵa qatysatyn medısınalyq uıymdardyń tizimin «Ashyq NQA» saıtynan kórýge bolady, onda qujat 21 qarashaǵa deıin jarııa talqylaý úshin ornalastyrylǵan.