QR Premer-Mınıstri Asqar Mamın BAQ ókilderimen kezdesýde Sberbankpen jasalǵan memorandýmǵa qatysty pikir bildirdi, dep jazady Egemen.kz.
«Taǵy da qaıtalap aıtqym keledi: birinshi kezekte biz úshin jeke derekterdi qorǵaý men aqparattyq qaýipsizdik basymdyqta bolady. Tek qana «Sber» platformasy bizge kodtardy alýǵa jáne kodtardy aqparattyq qaýipsizdik organdarynda saqtaýǵa múmkindik beredi. Iаǵnı shyn máninde biz jeke derekterdiń qorǵalýyn qamtamasyz etýge kepildik beremiz. Jáne árıne eń basty shart – bizdiń ári qaraı da sıfrlyq transformasııalanýymyz. Bizde Qazaqstanda 400-ge jýyq aqparattyq júıe bar, olardyń bir-birimen ózara árekettesýi tómen deńgeıde, derekter aıyrmashylyǵy bar jáne bul árdaıym tıimdi bola bermeıdi. Platformalyq sheshimder arqyly biz bul máseleni sheshe alamyz dep úmittenemiz», dedi A. Mamın.
Úkimet basshysy bul jumysqa jergilikti qazaqstandyq IT-sektor da tartylatynyn atap ótti.
«IT-sektor men qosymshalardy damytý úshin biz mindetti túrde ózimizdiń IT-sektordy tartamyz. Sondyqtan bizdiń azamattarymyzda sıfrlyq táýelsizdiktiń joǵalýy nemese jeke derekterdiń qoldy bolýy jóninde alańdaýshylyq bolmaýy tıis. Bul úshin biz jaýaptymyz. Úkimet jaýapty. Jáne biz bul mindetti qamtamasyz etemiz. Biraq memleketimizdiń odan ári damýy turǵysynan, sıfrlyq transformasııa turǵysynan bul jaı ǵana qajettilik. Biz osy baǵytta jumys isteýimiz kerek jáne seriktes retinde búginde «Sber» tobymen jumys istep jatyrmyz», dedi Asqar Mamın.