Jýyrda Soltústik Qazaqstan oblystyq polısııa departamenti Esirtki qylmysyna qarsy is-qımyl basqarmasy 1 maýsym men 31 qazan aralyǵynda ótken respýblıkalyq jedel-profılaktıkalyq «Qarasora» is-sharasynyń (JPISh) oblys boıynsha qorytyndylaryn shyǵardy.
JPISh aıasynda barlyǵy 125 zań buzýshylyq, onyń ishinde 47-i esirtki satý, ótkizý faktisi anyqtaldy. Is-sharanyń basty mindeti esirtki satý men taratýdy quryqtaý bolǵandyqtan, ásirese, osy qylmystardyń órshýine polısııa erekshe nazar aýdardy.
Esirtkimen qylmys jasaıtyndar da búkil elimizde jaman indet júrip, keıbir adamdardyń ólip jatqanyna qaramaı esirtki qylmysyn jalǵastyra bergen. Sonyń biri Jambyl aýdanynyń 39 jastaǵy turǵyny bolyp shyqty. Polıseıler ony operasııanyń alǵashqy kúnderinde Petropavldyń ortalyq kósheleriniń birinde júrgizilgen jedel-izdestirý is-sharalarynyń nátıjesinde ustaǵan. Onyń Subaru Legacy kóliginiń júksalǵyshynan 5 kılo marıhýana salynǵan polıetılen paket tárkilendi. Ustalǵan adam eki jyl boıy esirtki qoldanyp, satqanyn moıyndady. Munyń qara bazardaǵy quny ondaǵan mln teńge.
Atalǵan fakti Qylmystyq kodekstiń 297-baby 3-bóligi – «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha sotqa deıingi tergep-tekserýdiń biryńǵaı tizilimine engizilgen. 20 qyrkúıek kúni sottyń úkimimen nashaqor 10 jylǵa bas bostandyǵynan aıyryldy.
Bul JPISh barysynda Soltústik Qazaqstan oblysynda tirkelgen eń úlken qylmys boldy. Jalpy, «Qarasora» is-sharasy barysynda barlyǵy 295,5 kılogrammnan astam ártúrli esirtki zattary tárkilengen.
Oblystyq polısııa departamenti bastyǵynyń orynbasary, polısııa polkovnıgi Rýslan Nazarovtyń aıtýyna qaraǵanda: «Jyl basynan oblystyq Polısııa departamenti Esirtki qylmysyna qarsy is-qımyl basqarmasynyń qyzmetkerleri esirtki bıznesi salasynda 195 túrli qylmysty anyqtady. Onyń ishinde esirtkini ótkizýdiń 49 faktisi, 15 asa iri kólemde saqtaý faktisi boldy. 409,5 kg esirtki zattary tárkilengen».
Soltústik Qazaqstan oblysy