Búgin Nur-Sultan qalasynyń Dostyq úıinde Qazaqstan halqy Assambleıasynyń Respýblıkalyq Medıasııa keńesiniń otyrysy ótti, dep jazady Egemen.kz.
Otyrysta el Prezıdentiniń 2021 jylǵy 21 qazanda Qazaqstan halqy Assambleıasy Keńesiniń keńeıtilgen otyrysynda etnomedıasııany damytýǵa qatysty bergen tapsyrmalaryn iske asyrý máseleleri qaraldy.
Keńes otyrysyna Qazaqstan halqy Assambleıasy Tóraǵasynyń orynbasary – Hatshylyq meńgerýshisi Marat Ázilhanov, QR Parlamenti Májilisiniń depýtattary, memlekettik organdardyń, qoǵamdyq uıymdardyń, QHA qoǵamdyq qurylymdarynyń, Medıasııa ortalyqtarynyń ókilderi, QHA kásibı jáne kásibı emes medıatorlar, óńirlik medıasııa kabınetteriniń basshylary, BAQ jáne t.b. qatysty.
Otyrysty QHA Tóraǵasynyń orynbasary Marat Ázilhanov ashty. О́z sózinde, Qazaqstan halqy Assambleıasy 2010 jyldan bastap medıasııa ınstıtýtyn daýlar men janjaldardy sheshýdiń qoǵamdyq-quqyqtyq quraly retinde damytý boıynsha aýqymdy jumys júrgizip kele jatqanyn atap ótti. Medıasııa ınstıtýtynyń qyzmeti azamattardyń daýly jáne janjaldy jaǵdaılardy sheshý barysynda ymyraǵa kelýge daıyndyǵyn kórsetetin, qoǵamdyq sanany jańǵyrtýdyń mańyzdy markerleriniń biri bolyp tabylady.
Marat Ázilhanov daýlar men janjaldardy sheshý, azamattarǵa keńes berý boıynsha medıatorlarmen úlken jumys júrgizilip jatqanyn jetkizdi.
«El Prezıdenti bizdiń jaǵdaıda etnomedıasııa úshin kásibı kelissóz júrgizýshilerdiń formaty neǵurlym tıimdi bolyp tabylatynyn jáne Assambleıa osy baǵyttaǵy negizgi organ bolýy tıis ekenin atap ótti», - dedi QHA Tóraǵasynyń orynbasary.
Is-shara barysynda kelissóz júrgizýshi-etnomedıatorlardy daıarlaý júıesin qalyptastyrý tásilderi, tıisti oqý baǵdarlamasyn ázirleý erekshelikteri, etnomedıatorlarǵa qoıylatyn talaptar, sondaı-aq Qazaqstan halqy Assambleıasy sheńberinde qoǵamdyq medıasııa ınstıtýtyn odan ári damytý perspektıvalary talqylandy.
Qoıylǵan mindetterdi josparly jáne dáıekti iske asyrýǵa múmkindik beretin jumys pikiralmasýlar ótkizilip, olardyń qorytyndylary talqylandy.
Búginde elimizde QHA aıasynda 2 myńǵa jýyq qoǵamdyq medıator, 100-den astam kásibı medıator jumys isteıdi. О́ńirlerde 17 medıasııa kabıneti ashyldy jáne 300-den astam medıasııa alańy jumys isteıdi (sottarda, «Nur Otan» partııasynyń fılıaldarynda tatýlasý kabınetteri). Kásibı emes medıatorlardy oqytýǵa jáne olardyń biliktiligin arttyrýǵa kóp kóńil bólinedi. Jyl basynan beri 5 myńnan astam medıator men qyzyǵýshylyq tanytqan etnomádenı birlestikter ókilderi túrli kýrstar men semınarlarda tegin oqytyldy.
Daýlar men janjaldardy sheshý, azamattarǵa keńes berý boıynsha medıatorlar úlken jumys júrgizýde. Máselen, 2016 jyldan bastap 130 000-ǵa jýyq ótinim kelip tústi, olardyń 39%-y keńes berý barysynda sheshilse, 61%-men medıatıvtik kelisimder jasaldy. Bul jumyspen 310 myńnan astam adam qamtyldy.