QR Premer-Mınıstri Asqar Mamın Qazaqstan boıynsha mıssııa basshysy Nıkolıa Blanshe bastaǵan Halyqaralyq valıýta qorynyń (HVQ) sarapshylarymen kelissóz júrgizdi, dep habarlaıdy Egemen.kz.
Úkimet basshysyna Qazaqstandaǵy ekonomıkalyq ahýal, sondaı-aq pandemııa saldaryn tómendetý jáne halyq pen bıznesti qoldaý boıynsha QR-da júrgizilip jatqan saıasat boıynsha HVQ-nyń saraptamalyq baǵalaýlary men boljamdary tanystyryldy. Mıssııa bıylǵy jyldyń 10 aıynyń qorytyndysy boıynsha 3,5% deńgeıinde QR naqty JIО́ ósiminiń oń dınamıkasyn jáne óndiris kóleminiń pandemııaǵa deıingi deńgeıge qaıtarylýyn aıqyndady.
«Resmı organdardyń áreket etý sharalary halyqtyń tabysy men ekonomıkalyq belsendilikke tıgen soqqy áserin jumsartýda mańyzdy ról atqardy. Ekonomıkalyq saıasat sharalary áleýmettik mańyzy bar taýarlardyń baǵasyn retteýdi, áljýaz úı sharýashylyqtaryna aqshalaı tólem berýdi jáne asa zardap shekken sektorlar men shaǵyn jáne orta bıznes kásiporyndaryna ataýly kómek, onyń ishinde jeńildetilgen nesıe men salyqtyq jeńildikter berýdi qamtydy. «Jumyspen qamtýdyń jol kartasy» baǵdarlamasy aıasyndaǵy jobalar jumyspen qamtýdy qoldaýǵa yqpal etti», delingen HVQ mıssııasynyń málimdemesinde.
Halyqaralyq valıýta qory sarapshylarynyń boljamdaryna sáıkes, 2021 jyldyń qorytyndysy boıynsha qalpyna kelý serpinin odan ári saqtaı otyryp, QR ekonomıkasynyń ósý qarqyny 3,7%-ǵa jetedi. HVQ mıssııasy Qazaqstannyń qarjylyq qadaǵalaýdy kúsheıtý, ınflıasııalyq targetteý, salyqtyq jáne bıýdjettik ákimshilendirýdi sıfrlandyrý jónindegi sharalaryna, sondaı-aq 2060 jylǵa qaraı kómirtegi beıtaraptyǵyna qol jetkizý jónindegi mindettemelerine joǵary baǵa berdi.
Premer-Mınıstr Qazaqstan pandemııadan keıingi jańa shynaıylyq jaǵdaıynda sapaly jáne ornyqty damýdy qamtamasyz etý maqsatynda Memlekettik josparlaýdyń jańa júıesine kóshkenin atap ótti. Ony júzege asyrý aıasynda Úkimet óńirlik damý, kásipkerlik, AО́K, ekologııa, sıfrlandyrý, bilim jáne ǵylym, densaýlyq saqtaý jáne qoǵamdyq damý salalarynda ulttyq jobalar ázirledi.
Bul rette ınvestısııa tartýdyń jańa tásilderi ázirlenip, «jasyl» ekonomıkany qalyptastyrý baǵyty aıqyndaldy. Taraptar aqsha-nesıe, valıýta, salyq-bıýdjet saıasaty, bank salasyndaǵy ahýal, jeke sektordy damytý jáne Qazaqstanda júrgizilip jatqan ekonomıkanyń qurylymdyq reformalary máselelerin talqylady.
Kelissózge Premer-Mınıstrdiń birinshi orynbasary Álıhan Smaıylov, Strategııalyq josparlaý jáne reformalar agenttiginiń tóraǵasy Qaırat Kelimbetov, qarjy mınıstri Erulan Jamaýbaev, ulttyq ekonomıka mınıstri Áset Erǵalıev, Ulttyq bank tóraǵasynyń orynbasary Álııa Moldabekova qatysty.
Aıta keteıik, HVQ mıssııasy Qazaqstanǵa HVQ kelisiminiń IV babyna sáıkes jyl saıynǵy konsýltasııalardy ótkizý úshin jylyna eki ret keledi.