Búgin Shymkent qalalyq densaýlyq saqtaý basqarmasynyń basshysy Baqytjan Pozılov qala ákimdiginiń @akimat_shymkent ınstagram paraqshasynyń tikeleı efırinde KVI-ge qarsy vaksınalaý jumysynyń barysyn baıandady, dep jazady Egemen.kz.
Shymkentte 15 qarashadan bastap júkti áıelder men balalarǵa koronavırýsqa qarsy «Pfizer» preparatymen vaksınasııalaý bastalǵan bolatyn. Eki kún ishinde qalada 173 adam osy vaksınany qabyldaǵan.
Ekpe aldynan dárigerler turǵyndardy medısınalyq tekserýden ótkizip, qarsy kórsetilimderi bolmaǵan jaǵdaıda ekpe egýde. Mekemelerde profılaktıkalyq jumystardy júrgizýge barlyq jaǵdaı jasalǵan.
«Qalaǵa búginge deıin «Pfizer» vaksınasynyń 46 800 dozasy jetkizildi. Bul preparattyń quramynda ımmýndyq qorǵanys jasaıtyn vırýs bolmaǵandyqtan, koronavırýs ınfeksııasyn týyndatpaıdy. Vaksınasııa 21-28 kún aralyqpen eki ret júrgiziledi», dedi qalanyń bas dárigeri.
«Pfizer» ekpesi 12-den 18 jasqa deıingi jasóspirimderge, júkti áıelder men laktasııa kezeńindegi áıelderge erikti túrde salynady. Profılaktıkalyq vaksına azamattardyń óz kelisimimen ǵana júrgiziledi. Al jasóspirimderdi vaksınasııalaý ata-anasynyń nemese zańdy ókiliniń kelisimimen júzege asady.
Efır barysynda B.Pozılov turǵyndar joldaǵan 50-den asa suraqqa jaýap berdi. Suraqtardyń basym bóligi jasóspirimder men júkti áıelderge salynatyn vaksınanyń áseri jóninde boldy.
Vaksına alǵandardyń ishinde 133-i jasóspirim, 28-i júkti áıel jáne 12-si bala emizetin ana. Basqarma basshysynyń sózinshe, ekpe alǵandar arasynda keri reaksııa jaǵdaıy tirkelmegen.