Qaraǵandy oblysynda avtokóliktiń barlyq túrleri úshin qozǵalysqa shekteý qoıyldy, dep habarlaıdy Egemen.kz QR Indýstrııa jáne ınfraqurylymdyq damý mınıstrligine silteme jasap.
Atap aıtqanda, búgin saǵat 18.00-den bastap aýa raıynyń nasharlaýyna baılanysty (boran, joldyń nashar kórinýi) «Ekaterınbýrg-Almaty» avtojolynyń 1505-1847 shaqyrym aralyǵynda, ıaǵnı Jumabek aýyly men Balqash qalasy arasyndaǵy («SP KazGerStroı» JShS jáne «SITIS Constraction» rekonstrýksııalaý ýchaskesi) ýchaskede avtokóliktiń barlyq túrleri úshin qozǵalysqa tyıym salyndy.
«Tótenshe jaǵdaılardy boldyrmaý maqsatynda kólik ıelerine alys saparǵa shyqpaýǵa keńes beriledi. Oqys jaǵdaı oryn alsa, 1403 nómiri boıynsha táýlik boıy jumys isteıtin call-ortalyqqa habarlasýǵa bolady», dedi vedomstvodan.