Elorda men Almaty ákimdikteri jańajyldyq merekelerde qala qalaı bezendiriletinin aıtty, dep habarlaıdy Egemen.kz.
Almaty qalasy ákimdiginiń mádenıet basqarmasy qazirgi ýaqytta jańajyldyq bezendirýdiń qalalyq tujyrymdamasy pysyqtalyp jatqanyn aıtty. Bıýdjet qarajatyn únemdeý úshin ákimdik byltyr paıdalanylǵan buıymdardy qalpyna keltirýdi josparlap otyr.
«Bıyl qala turǵyndary kóp jınalatyn jergilikti jerlerdi bezendirý josparlanǵan. Jańa jylǵa arnalǵan shyrshalar ornatý jáne merekelik bezendirý jumystary 16 jeltoqsan - Qazaqstan Respýblıkasynyń Táýelsizdik kúninen keıin júrgiziledi», dedi mádenıet basqarmasy basshysynyń orynbasary Naılıa Mýlıýkova.
Nur-Sultan ákimdigi málimetinshe, qala kóshelerin jańajyldyq bezendirý úshin byltyrǵy shamdardy, ınstallıasııalardy jáne basqa da áshekeılerdi paıdalaný josparlanǵan. Al aýdandarda ákimdik balansyndaǵy shyrshalar qoıylady. Qysqy demalysqa arnalǵan barlyq qoǵamdyq oryn shaǵyn arhıtektýralyq formalarmen jáne ınstallıasııalarmen bezendiriledi.
«Qalany bezendirý úshin jańajyldyq shyrshalar, byltyrǵy materıaldar paıdalanylady. Áshekeılerdiń elementteri uzaq ýaqyt paıdalanýǵa arnalmaǵan qoljetimdi materıaldardan jasalǵandyqtan, jóndeý-qalpyna keltirý jumystaryn júrgizgennen keıin byltyrǵy áshekeıler men shaǵyn arhıtektýralyq formalardyń 50-60 paıyzdan astamyn paıdalaný josparlanǵan», dedi ákimdik ókilderi.
Qalanyń ár aýdanynda ákimdikter áshekeılerdi jalpy tujyrymdama boıynsha jabdyqtaıdy.
Almaty aýdany: 10 taqyryptyq alańdy (Trıatlon saıabaǵy, «Qazaq eli» monýmentiniń janyndaǵy alań, Aqbulaq ózeniniń jaǵasy, Oqýshylar saraıy, «Prezıdent saıabaǵy» (Haıvıll), «Jeruıyq saıabaǵy»), onyń ishinde tórt turǵyn úıdegi qoǵamdyq oryndardy, onda jeti muz syrǵanaǵy men bes syrǵanaý alańyn jabdyqtaý josparlanǵan. Baıqońyr aýdany: aýdan ákimdiginiń balansyndaǵy bıiktigi 18, 15 jáne 8 metr bolatyn bes jańajyldyq shyrsha ornatylady. Saryarqa aýdany: jyl saıyn bekitilgen merekelik tujyrymdamaǵa sáıkes, osy aýdanda bes jerde qysqy demalys oryndary uıymdastyrylady. Esil aýdany: aýdan eki jyldan asa ýaqyt ótkendegi shaǵyn sáýlet nysandary arqyly bezendirildi.Sondaı-aq, ákimdik Jańa jyldy toılaýǵa arnalǵan birqatar mádenı sharalardy, sonyń ishinde fılarmonııanyń konsertterin, balalar jáne eresekter teatrlarynda jańajyldyq qoıylymdardy daıyndaǵan.