Pavlodar qalasyndaǵy Mır kóshesinde ornalasqan garaj boksynda áıel men eki er adamnyń máıiti tabyldy. Sotqa deıingi tergeý erli-zaıyptylardyń avtokólik jóndeýmen aınalysqan garajdy jalǵa alǵanyn anyqtady, dep jazady Egemen.kz.
«Erli-zaıyptylar jumys ornynda bolǵan kezde olarǵa otbasylyq dosy kelgeni belgili boldy. Barlyǵy birge garajda ishimdik ishken, sýyta bastaǵan soń Mercedes Benz markaly avtokólikti iske qosyp, uıyqtap qalǵan. Máıitterdi kórshi garajdyń jalǵa alýshysy tapty, ol bul týraly polısııaǵa habarlady. Garajdyń ishi avtokóliktiń gaz qubyrynan shyqqan tunshyqtyrǵysh gazǵa toly bolǵan. Júrgizilgen sot-medısınalyq saraptamalarǵa sáıkes, úsh adamnyń ólimi ýly gazben ýlaný saldarynan bolǵan», dedi Pavlodar oblysy Polısııa departamenti bastyǵynyń orynbasary Rashad О́teýov.
Tártip saqshysy Gagarın kóshesinde ornalasqan garaj kooperatıviniń boksyndaǵy er adam da osyndaı qaıǵyly ólimmen kóz jumǵanyn jetkizdi.
14 qarashada bir er adam polısııaǵa qońyraý shaldy. Anyqtalǵandaı, ol garaj boıynsha kórshisi bolyp shyqty. Er adam óz kóligin garajǵa kirgizgen kezde kórshi garajdan kólik qozǵaltqyshynyń iske qosylǵan dybysyn estigenin jáne shamnyń janyp turǵanyn túsindirdi. Garajdyń esigin qaqty, biraq eshkim ashpady. Er adam ýaıymdaı bastady, polısııa shaqyrdy. Oqıǵa ornyna kelgen polıseıler oblys ortalyǵynyń 44 jastaǵy turǵynyn VAZ-21150 markaly avtokóliginen tapty. Qazirgi ýaqytta sot-medısınalyq saraptama taǵaıyndaldy. Aıta keteıik, máıitter tabylǵan kezde garajdaǵy kólikter jumys istep turǵan.
«Kez kelgen kólik júrgizýshisi qaýipsizdik sharalaryn baıyppen qabyldaýǵa mindetti. Gazben ýlanýdyń aldyn alý úshin júrgizýshiler kóliktiń gaz shyǵarý júıeleriniń jumysqa jaramdylyǵyn, olardyń germetıkalyǵyn udaıy tekserip otyrýy tıis», dedi Rashad О́teýov.