Qazaqstanda aqyly avtomobıl joldarymen júrý tarıfteri ósedi me? Bul suraqqa QR Indýstrııa jáne ınfraqurylymdyq damý vıse-mınıstri Berik Kamalıev jaýap berdi, dep habarlaıdy Egemen.kz.
«Búginde bizde 2013 jyly engizilgen tarıfter qoldanylady. Olar ósken joq jáne aldaǵy ýaqytta kóterilmeıdi. Mundaı másele qarastyrylmaıdy. Tarıfterdiń kóteriletini týraly aqparat shyndyqqa janaspaıdy», dep atap ótti Berik Kamalıev «Qazavtojol-Kaztraffic-2021» halyqaralyq kórmesiniń ashylýynda.
Aıta ketsek, elordada «Qazavtojol-Kaztraffic-2021» halyqaralyq kórmesi bastaldy. Kórmeniń ekspozısııasy jol jáne aerodrom jabyndaryn salý, jóndeý, kútip ustaý boıynsha zamanaýı tehnologııalardy óndirý men engizýdi júzege asyratyn kompanııalarmen usynylǵan.
Is-sharaǵa Qazaqstan Respýblıkasy, Reseı Federasııasy, Belarýs, Ýkraına, Germanııa, Fransııa, AQSh kásiporyndary qatysady. Túrkııa ekspozısııasy bólek usynylady.