QR Parlamenti Senatynyń tóraǵasy Máýlen Áshimbaev aldaǵy úshjyldyq bıýdjet týraly sóz qozǵady, dep habarlaıdy Egemen.kz.
«Biz Ulttyq qordan kepildendirilgen transfert týraly jáne 2022-2024 jyldarǵa arnalǵan respýblıkalyq bıýdjet týraly zań jobalaryn qaradyq. Jalpy aldaǵy úsh jylǵa arnalǵan bıýdjet elimizdiń damýyndaǵy basymdyqtardy qamtamasyz etýge baǵyttalǵan. Sońǵy jyldary Qazaqstanda pandemııa saldaryn eńserýge basymdyq berilgeni belgili», dedi Máýlen Áshimbaev Senattyń jalpy otyrysynda.
Onyń aıtýynsha, Memleket basshysynyń tapsyrmasymen azamattar men zardap shekken kásiporyndarǵa qoldaý kórsetýge qomaqty qarajat jumsalýda.
«Jaǵdaı áli de máz emes. Biraq, Qazaqstan pandemııa daǵdarysyn eńserip keledi dep aıtýǵa bolady. Sondyqtan aldaǵy úsh jyldyń bıýdjeti qaıta qalypqa kelýge jáne damýǵa baǵyttalyp otyr. Prezıdenttiń bıylǵy Joldaýynda pandemııadan keıingi kezeńde ekonomıkany qalpyna keltirýdiń naqty mindetteri belgilendi. О́nerkásiptiń tıimdiligin arttyrýǵa, óńirlerdi damytýǵa, halyqty alańdatqan ózekti áleýmettik máselelerdi sheshýge qatysty maqsat-mindetter aıqyndaldy. Memleket basshysynyń tapsyrmasyna sáıkes, jańa Memlekettik josparlaý júıesi aıasynda 10 Ulttyq joba ázirlenip, bekitildi. Olar ekonomıkanyń ósýine jáne azamattarymyzdyń ómir súrý sapasyn jaqsartýǵa baǵyttalǵan», dedi Senat Spıkeri.
Joǵary palata tóraǵasy búgin qaralǵan úsh jyldyq bıýdjette sol jobalardy iske asyrý úshin tıisti qarajat bólinip otyrǵanyn atap ótti. Ol ár teńgeni oryndy paıdalanyp, memleket qarjysynyń tıimdiligin arttyrý asa mańyzdy ekendigin basa aıtty.
«Jalpy, aldaǵy úshjyldyq bıýdjetti Úkimet úshin úlken synaq deýge bolady. Sebebi, Úkimet ekonomıkany damytý qarqynyn arttyrý jáne kóleńkeli sektordy azaıtý arqyly bıýdjettiń kirisin 35%-ǵa ósirýdi kózdep otyr. Sonymen birge bıýdjet tapshylyǵyn kezeń-kezeńimen tómendetý jáne Ulttyq qordan bólinetin transfertter kólemin qysqartý josparlanǵan. Bul máseleni Senat depýtattary buǵan deıin de kótergen bolatyn. Búgin Úkimettiń osy baǵyttaǵy belsendiligin baıqap otyrmyz. Osyndaı bastamalardy biz, árıne, qoldaımyz. Soǵan qaramastan memlekettiń barlyq áleýmettik mindettemeleri tolyǵymen oryndala beredi», dedi Máýlen Áshimbaev.