Jambyl oblysynda bir táýlikke jýyq soqqan daýyl saldarlary joıylyp jatyr, dep habarlaıdy Egemen.kz.
Tarazda sekýndyna 38 metrge deıin soqqan qatty jel qala ınfraqurylymyna aıtarlyqtaı zııan keltirdi.
19 kópqabatty úıdiń, 17 mekteptiń, 4 balabaqshanyń shatyry búlingen. Elektr jelileriniń zaqymdalýyna baılanysty jylý jetkizetin bes shaǵyn qazandyq toqtatyldy. 45 aǵash, 12 aıaldama jáne 32 baǵdarsham qulady. 34 bılbord, 9 jarnamalyq pılon jáne 64 jalaý zaqymdalǵan.
Taraz qalasy ákimdiginiń medıa ortalyǵy málim etkendeı, búgingi kúnniń nátıjesi boıynsha toqtatylǵan bes qazandyqtyń tórteýi qosylyp, 52 kópqabatty turǵyn úıdiń turǵyndaryna jylý taratyldy. Elektr energııasynyń joqtyǵynan «Bınom» TK №7 úıin jylytatyn bir qazandyq áli qosylmaǵan. Gazben jabdyqtaýǵa 187 abonent qosyldy, 39-yn (jeke turǵyn úıler) aıaqtaý qaldy. 32 baǵdarshamnyń 18-i qaıta ornatyldy. Jel soqqan barlyq 12 aıaldama qalpyna keltirildi. 45 iri qulaǵan aǵashtardyń 35-i alynyp tastaldy. Mektep oqýshylaryn oqytýǵa keletin bolsaq, búgingi kúni Taraz qalasynyń aýmaǵynda 19 mektep oflaın rejıminde, 41 mektep onlaın rejıminde oqıdy. 45 balabaqshanyń 41-i burynǵy rejımde jumys isteıdi, tórt balabaqshada jelmen zaqymdalǵan shatyrlardy qalpyna keltirý qajet.
«Keltirilgen zalal boıynsha esep aıyrysý júrgizilýde. Barlyq kommýnaldyq kásiporyndar men mekemeler kúsheıtilgen rejımde jumys isteýde. Qalpyna keltirý jumystary jalǵasýda», dedi Taraz qalasynyń ákimdigi.
Eske sala ketsek, 16 qarashada Jambyl oblysynyń aýmaǵynda jeldiń sekýndyna 30 metrge deıin kúsheıýi týraly habarlandy. Jambyl oblysynyń polısııa departamenti kólik júrgizý qaýipti bolǵandyqtan, júrgizýshilerdi múmkindiginshe úıde bolýǵa shaqyrdy.