Jambyl oblysyndaǵy jol sapasy úshin 211 sheneýnik jazalandy, dep habarlaıdy Egemen.kz.
Bul týraly Polisia.kz saıty jazady.
Saıt málimetinshe, bıyl oblysta 1684 jol tekserisi júrgizilip, tekserý barysynda 11 713 aqaý anyqtalǵan.
«Júrgizilgen tekserýler nátıjesi boıynsha jol uıymdarynyń basshylaryna 1684 nusqaý berilgen. Avtokólik joldaryn kútip ustaýdaǵy kemshilikter boıynsha 323 aqparat joldandy», delingen habarlamada.
Sondaı-aq, temirjol ótkelderine barlaý jumystary júrgizilip, 185 aqaý anyqtaldy. О́tkelderge qyzmet kórsetetin mekeme basshylaryna olardy joıý týraly 71 uıǵarym shyǵaryldy. «Berilgen nusqaýlarǵa sáıkes, oblystyq mańyzy bar joldarda 3185 jol belgisi ornatyldy, 6802 shaqyrymnan asa jol syzbalary salyndy, 154 541 sharshy metr jol jóndeldi, 53 jol býferleri aýystyryldy, 1660 dana sıgnal baǵanalary men 8515 jaryq shaǵyldyrǵyshtary ornatyldy», delingen habarlamada.Joldardy kútip ustaý jáne jol qozǵalysy qaýipsizdigin qamtamasyz etpegeni úshin 211 laýazymdy tulǵa ákimshilik jaýapkershilikke tartylǵan.
«Joldarda jumystardy oryndaý, joldardy, jol ótkelderin jáne basqa da jol qurylystaryn kútip ustaý talaptaryn oryndamaǵany úshin QR ÁQBtK-niń 631-baby 1-bóligine sáıkes 129 laýazymdy tulǵa ákimshilik jaýapkershilikke tartyldy. Taǵy bir laýazymdy tulǵaǵa qatysty osyǵan uqsas, biraq jol-kólik oqıǵasyn jasaýǵa ákep soqqan quqyq buzýshylyq úshin ákimshilik hattama toltyryldy (QR ÁQBtK-niń 631-baby 2-bóligi). Avtomobıl joldaryn, temirjol ótkelderin jáne jol qozǵalysyn retteýdiń basqa da qurylystaryn nemese tehnıkalyq quraldaryn búldirgeni úshin (QR ÁQBtK-niń 630-baby, 1-bóligi) 79 tulǵa ákimshilik jaýapkershilikke tartyldy», dedi Jambyl oblysy boıynsha PD JPB basshysy Jaıdarbek Quttybaev.
Sonymen qatar, Taraz qalalyq polısııa basqarmasy men Merki aýdandyq polısııa bólimi bergen nusqamalardy oryndamaǵany úshin QR ÁQBtK-niń 462-babynyń 3-bóligi boıynsha «Taraz qalasy ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi» KMM men Merki aýdany T.Rysqulov aýyldyq okrýginiń ákimdigi ákimshilik jaýapkershilikke tartyldy.