Shymkent qalasyn turǵyndardyń ómir súrýine qolaıly ári qaýipsiz qala etý maqsatynda jyl saıyn kóshelerge jáne kóp qabatty turǵyn úılerge qoıylyp jatqan beınebaqylaý kameralarynyń sany artyp keledi, dep jazady Egemen.kz Shymkent qalasy ákimdiginiń baspasóz qyzmetine silteme jasap.
Beınebaqylaý kameralary quqyq buzýshylyqtyń aldyn alýǵa jáne qylmystardy izin sýytpaı ashýǵa kómek kórsetedi.
Qalaǵa ótken jyly 3 153 kamera, bıyl 3 177 kamera qoıyldy. Onyń ishinde 4 441-i qoǵamdyq qaýipsizdikti saqtaýǵa, 1889-y jol qaýipsizdigine baǵyttalǵan. Olardyń barlyǵy Polısııa departamentine qarasty jedel basqarý ortalyǵy arqyly basqarylady. Jańadan qoıylǵan kameralar qylmys ashýda óziniń tıimdiligin kórsetip úlgerdi.
Shymkent qalasynyń polısııa departamentiniń habarlaýynsha, 15-21 qarasha aralyǵynda «102» arnasyna 4628 qońyraý túsken. Sol aralyqta beınebaqylaý kameralarynyń kómegimen urlyq, buzaqylyq, tonaý sekildi 9 qylmys ashylǵan. Odan bólek, nóldik tózimdilik qaǵıdaty jáne ákimshilik quqyq buzýshylyqtar boıynsha 1736 jaıt anyqtalǵan. Onyń ishinde 1166 jaǵdaı jol qozǵalysy erejelerin buzýǵa qatysty.
Aıta ketsek, Shymkentte bıyl 10 aıda 271 jol-kólik oqıǵasy tirkelgen. Osy jol-kólik oqıǵasynyń saldarynan 48 adam qaza taýyp, 248 adam ártúrli dene jaraqatymen aýrýhanaǵa tústi. Jol-kólik oqıǵalarynyń basty sebebi – júrgizýshilerdiń avtokólik jyldamdyǵyn shamadan tys asyrýy. Osyǵan baılanysty jol-kólik oqıǵalary jıi oryn alatyn 41 tar kóshe men ózge qaýipti aımaqtar anyqtaldy. Turǵyndar suranysymen beınejazba kameralarynyń ishinen joǵaryda atalǵan oryndarǵa 40 km/saǵat jyldamdyqpen júrý jol belgileri ornatyldy. Al qalǵan joldarda Jol júrisi qaǵıdalaryna sáıkes 60 km/saǵat jyldamdyqpen júrý ruqsat etilgen.