Senatta «Qazaqstan Respýblıkasynyń syrtqy jáne ishki saýdasy salalaryndaǵy zańnamalyq bazany jetildirý men tıimdi saıasatty iske asyrý» taqyrybyna arnalǵan úkimet saǵaty ótti, dep jazady Egemen.kz Senattyń baspasóz qyzmetine silteme jasap.
Senat Tóraǵasynyń orynbasary Nurlan Ábdirov úkimet saǵaty otyrysyn asha kelip, Qazaqstannyń saýda salasynda júıeli problemalar, onyń ishinde kóleńkeli tustary da bar ekenin atap ótti. Tóraǵa orynbasary sonymen qatar otyn-energetıkalyq taýarlar, atap aıtqanda, eksport kóleminiń 51,5%-yn aqsha balamasyndaǵy munaı jáne munaı ónimderi burynǵysha qazaqstandyq eksporttyń negizin qurap otyrǵanyn aıtty.
«Bizdiń mindetimiz – saýda salasyn turaqty damytý jáne onyń básekege qabilettiligin arttyrý úshin júıeli jáne ınstıtýsıonaldyq negiz jasaý bolyp tabylady. Birinshi kezekte, ol ishki naryqty sapaly jáne qaýipsiz ónimmen qamtamasyz etýge múmkindik beretin jaǵdaılar jasaý. Ol sondaı-aq qazaqstandyq ónimdi syrtqy naryqtarǵa ilgeriletý úshin qolaıly jaǵdaı jasaý bolyp otyr», - dep atap ótti Nurlan Ábdirov.
Palata Tóraǵasynyń orynbasary sonymen qatar EAEO elderiniń aýmaǵynda qazaqstandyq taýarlardyń eksporty men tranzıtine áli de shekteý bar ekenin atap ótti. Sondaı-aq otandyq naryqtaǵy sertıfıkattardy tehnıkalyq retteýde, qazaqstandyq sertıfıkattyń basqa elderde, onyń ishinde EAEO-da moıyndalmaýyna baılanysty problemalar bar. Nurlan Ábdirovtyń aıtýynsha, bul problemalardy sheshý Qazaqstannyń syrtqy jáne ishki saýdasyn odan ári damytý úshin asa mańyzdy.
Senattyń Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Dáýren Ádilbekov óz kezeginde elimizdiń syrtqy jáne ishki saýdasyn damytý Palata úshin basym máselelerdiń biri ekenin atap ótti. Ol búgingi tańda qajetti tıisti zańnamalyq baza ázirlenip, memlekettik qoldaý júıesi jumys istep jatqanyn jetkizdi. Alaıda, senatordyń aıtýynsha, depýtattardyń kásipkerlermen kezdesýi kezinde aıtylǵan, áıtse de sheshimin tappaǵan máseleler áli de bar.
«Kezdesý barysynda bıznes sýbektileri otandyq naryqta ımporttyq, kóbinese sapasy tómen ónimderdiń qaptap ketýi jáne sapa sáıkestiginiń jalǵan sertıfıkattarynyń bolýy máselesin kóteredi. Sondaı-aq ınfraqurylymdy damytý deńgeıiniń tómendigi, jalǵa alý quny men jyljymaıtyn múlik obektileri baǵasynyń joǵary bolýy ShOB-tyń iri saýda ortalyqtaryna qoljetimdiligin shekteýge alyp keledi», dedi Dáýren Ádilbekov.
Saýda jáne ıntegrasııa mınıstri Baqyt Sultanov depýtattardyń dálelderimen kelise otyryp, saýdanyń tıimdi damýyna birqatar problemalar kedergi bolatynyn, onyń ishinde saýdanyń qazirgi zamanǵy túrleri men sıpattarynyń azdyǵy, sapaly saqtaý ınfraqurylymnyń jetispeýshiligi men saýda-logıstıka tizbeginiń obektilerin úılestirýdiń joqtyǵy aýyl sharýashylyǵy ónimderin aýqymdy shyǵynǵa, deldaldyń kóbeıýi men baǵanyń negizsiz ósýine alyp keletinin jetkizdi. Sala basshysy Úkimet saǵatynyń qatysýshylaryna búgingi kórinister men qazirgi problemalardy eskere otyryp, mınıstrlik Qazaqstannyń syrtqy jáne ishki saýdasyndaǵy jaǵdaıdy jaqsartý jóninde keshendi jumystar júrgizilip jatqanyn habarlady.
Senator Dáýren Ádilbekov úkimet saǵatynyń jumysyn qorytyndylaı kelip, kezdesý barysynda aıtylǵan usynystar men usynymdar Úkimetke jiberiletinin atap ótti.