Interpoldyń Bas Assambleıasynda Qazaqstannyń Ishki ister mınıstri halyqaralyq polısııa yntymaqtastyǵy máselelerin talqylady, dep habarlaıdy Egemen.kz.
Ystanbuldaǵy halyqaralyq qylmystyq polısııa uıymynyń Bas Assambleıasy – Interpoldyń 89-shy sessııasy ótip jatyr, onda qazaqstandyq delegasııany Ishki ister mınıstri Erlan Turǵymbaev basqarady.
Assambleıaǵa 160 eldiń ókilderi, sondaı-aq Interpoldyń ulttyq ortalyq bıýrosy, onyń ishinde Qazaqstan men halyqaralyq uıymdar – BUU, DSU, HKU, Europol, Ameripol, Aseanapol basshylary, Ortalyq Amerıka, Meksıka jáne Karıb óńiri polısııa basshylarynyń komıssııasy jáne t.b. qatysady.
Assambleıada Interpoldyń jahandyq qaýipsizdikti qamtamasyz etýde mańyzdy ról atqaratyny, jalpy qylmyspen kúres salasynda qatysýshy elderdiń ulttyq quqyq qorǵaý organdarynyń kúsh-jigerin biriktirý salasynda keń múmkindikter beretini atap ótildi.Túrkııa Respýblıkasynyń Prezıdenti Rejep Erdoǵan qatysýshylarǵa arnaǵan sózinde halyqaralyq terrorızmge qarsy kúrestegi halyqaralyq qylmystyq polısııa uıymynyń mańyzdylyǵyn atap ótti.
– Men úshin órkenıetter toǵysatyn osy qalada Interpol Assambleıasyn qabyldaý úlken mártebe. Bul kezdesý bárimizdiń elimizdiń qaýipsizdigi men qorǵalýyn qamtamasyz etýge úlken úles qosady dep senemin, – dep atap ótti Túrkııa basshysy.Assambleıa alańynda Erlan Turǵymbaevtyń Túrkııa Respýblıkasynyń Ishki ister mınıstri Soılý Súleımanmen, sondaı-aq Sıngapýr, Koreıa Respýblıkasy, BAÁ jáne t.b. polısııa vedomstvolary delegasııalarynyń basshylarymen ekijaqty kezdesýleri ótti. Sheteldik áriptesterimen kezdesý barysynda mınıstr halyqaralyq polısııa yntymaqtastyǵynyń ózekti máseleleri, sonyń ishinde transulttyq qylmys, esirtki bıznesi, zańsyz kóshi-qon, adam saýdasy, kıberqaýipsizdik, qylmyskerlerdi ustaý jáne basqa da máselelerdi talqylady.