Reseıden jetken dabyl

Soltústik Qazaqstan oblysynda bir aptanyń ishinde juqa bolsa da úzilissiz jaýǵan qar jeldiń úıirýimen keıbir jazyq óńirlerde joldardy da jaýyp úlgerdi. Ýálıhanov aýdanynda da sondaı jaǵdaı týǵan. 22 qarashada túngi mezgilde osy aýdannyń Aqbulaq aýylyn­a jaqyn mańda 1981 jyly týǵan Reseı azamaty «Shevrole Krýz» jeńil kóligimen kele jatady. Onyń kózdegeni Aqmola oblysynyń Aqsý aýyly eken. Sondaǵy bir týysynyń jer­leýine asyqqan jigit týra joldarmen jetýge tyrysady. Ol qalyń qar basqan jolda adasyp, turyp qalady. Dál osy jerde eshqandaı baılanys jelisi de joq eken. Tún bolsa sýytyp barady, ótip jatqan kólik joq, ańyraǵan aıdala. Alaıda jigit júrip kele jatqanda Vol­go­gradta jatqan jubaıyna ha­barlasyp, joldan adasyp kele jatqanyn, qaıda baryp toq­taryn bilmeıtinin aıtyp úl­geripti. Áıeli bolsa Reseı Fe­derasııasynyń TJM óńirlik basqarmasyna jedel habarlasady. Ondaǵylar qazaqstandyq áriptesteriniń derekterin be­rip, baılanysýǵa kómek­te­sedi. So­dan Ýá­lı­ha­nov aýda­nynyń or­talyǵy Kish­kenekól aýylyn­da izdes­­tirý-qutqarý ju­mys­­ta­rynyń jedel shtaby qu­ry­lady. Onyń quramyna Tó­ten­she jaǵdaılar bóliminiń, Ýálıhanov aýdanynyń polısııa qyzmetiniń jáne jergilikti Aqbulaq jáne Teljan aýyldyq okrýgteriniń ókilderi enedi.

«Izdestirý jumystary bar­lyq 5 baǵyt boıynsha jú­zege asyryldy, sebebi sol jerde birneshe aýyl joldary bar edi. Tún túnegin tú­rip, bir-birine qarsy 7 kó­lik ekıpajymen 11 adam qozǵal­­dy. Nátıjesinde, 100-den astam shaqyrym júrgen qut­qarýshylar 4 saǵattan keıin ǵana zardap shegýshini tap­ty. Tisi-tisine tımeı, diril­dep tońǵan ony jyly mashınaǵa otyrǵyzyp, kóligin súırep Kish­­ke­nekólge jet­kiz­dik», deı­­di TJ bóli­miniń bas­ty­ǵy Baýyr­­jan Rahym­janov.

40 jastaǵy azamat ózin qut­qarýǵa kelgenderdiń bárine alǵysyn jaýdyryp, saparyn qaýipsiz jolmen jalǵastyrdy. Áıeli de Volgogradtan telefon soǵyp, oblystyq TJD basshylyǵy men mamandaryna júrgizilgen qutqarý operasııasy úshin alǵys aıtty. Azamatyn aman qutqarǵany úshin ol úsh jas balasy men túni boıy balasyn kútken qaıyn enesiniń atynan da alǵys jetkizdi. Sóıtip bir adam ajaldan aman qaldy. Al Soltústik Qazaqstan ob­lystyq TJD bıylǵy qysta alǵashqy adamdy qutqardy. Al byltyrǵy maý­symda olar 639 adamdy qut­qarǵan. Onyń úsheýi jas bala.

Soltústik Qazaqstan oblysy