Otandyq sharýalardy ne qyzyqtyrady?

«Qazagromarketıng» AQ-tyń málimeti boıynsha, otandyq sharýalardy qyzyqtyratyn basty aqparat – bul aýylsharýashylyq óndirisin nesıeleý men sýbsıdııalaý baǵdarlamalary. Qazagromarketıngtiń sall-ortalyǵyna habarlasqan sharýalar dál osy saýaldardy jıi qoıady. 2013 jyldyń qorytyndylary boıynsha baılanys ortalyǵynyń operatorlary 1200-ge jýyq qońy­raýǵa jaýap bergen, saýaldardyń 500-i mal sharýashylyǵy men ósimdik sharýashylyǵyna nesıe alý men tehnıka lızıngine qatysty bolǵan. Sonymen qatar, qońyraý shal­ǵan­dardyń arasynda «Agrobız­nes-2020» baǵdarlamasy aıasynda nesıeler men tehnıka lızıngin arzandatý jaıyndaǵy aqparat joǵary suranysqa ıe boldy. Munymen qosa qazaqstandyq agroónerkásip sýbektileri ósimdik jáne mal sharýashylyqtaryna sýbsıdııa alý sharttary týrasyndaǵy jáne agrarlyq salaǵa qajetti qu­ral-jabdyqtardy, arnaıy hı­mııalyq zattardy, taǵy basqa ke­rek-jaraqtardy satatyn kásip­oryndar týraly aqparatqa muq­taj ekendigi anyqtaldy. Aıta keter­ligi, «Qazagromarketıng» AQ-tyń elimizdiń túkpir-túkpirindegi ókil­dikteri agrarlyq saladaǵy bar­lyq kompanııalar týraly aqparatty jınap, keń aýqymdy derek qoryn jasap shyǵarǵan bolatyn. Esterińizge salatyn bolsaq, «Qazagromarketıng» AQ-tyń sall-ortalyǵy 2008 jyly qurylǵan. Bul jeli arqyly aýylsharýashylyq taýar óndirýshileri agrarlyq salany memlekettik qoldaý sharalary jónindegi aqparatty bilip, «QazAgro» holdınginiń enshiles kásiporyndary beretin jeńildetilgen nesıeler týrasyndaǵy málimettermen qany­ǵa alady. Sonymen qatar, agroónerkásip kesheni úshin qajetti barlyq materıaldyq-tehnıkalyq resýrstar men qyzmet túrlerin usy­na­tyn jekemenshik kompanııalar jónindegi aqparat jaıynda habardar bolý múmkindigi de qarastyrylǵan. Aıta keterligi, bul jelige kez kelgen operatordyń uıaly nómiri­nen jáne elimizdiń kez kelgen aıma­ǵyndaǵy stasıonarlyq telefonnan tegin habarlasýǵa bolady. Jeli­­ni qurýdaǵy basty maqsat – sharýa­lardyń aqparattyq-keńistik qyzmetterge degen qoljetimdiligin arttyrý. Byltyrdan beri jelige kelip túsken saýaldar kúrt artqan. Munyń sebebi, Aýyl sharýashylyǵy mınıstrligi jáne «QazAgro» hol­dıngi tarapynan qarastyrylǵan memlekettik qoldaý quraldarynyń artýy, jeli týraly aqparattyń sharýalarǵa kóptep jetkizilýinde. Baılanys ortalyǵyna habar­lasqandar qazaq-orys tilderinde aqparat ala alady. Jeli operator­larynyń málimeti boıynsha, habaralasýshylardyń 80%-dan astamy saýaldaryn memlekettik tilde joldaıdy. Byltyrǵy málimetke súıensek, jelige eń kóp habarlasatyn aımaqtar – ol Almaty, Ońtústik jáne Shyǵys Qazaqstan oblystary. «Egemen-aqparat».