Aralas jekpe-jekten One Championship uıymynda kúsh synasyp júrgen Qaırat Ahmetov óziniń kelesi kezdesýin 4 jeltoqsanda Sıngapýrde Dennı Kıngademen ótkizedi.
Ár jeńisinen keıin «Qara jorǵa» bıin bılep, qalyń kórermenniń yqylasyna bólenip júrgen qandasymyz sońǵy ret 2019 jyldyń naýryz aıynda oktagonǵa shyqty. Shyny kerek, jankúıerler Qaıratty qatty saǵynyp qaldy. Jalpy, 34 jastaǵy Almaty oblysy Sarqan aýdanynyń týmasy osy sport túrin serik etkeli beri 25 jekpe-jek ótkizip, sonyń 23-inde basymdyq tanytty. 15 básekeni merziminen buryn aıaqtady. Kezinde ol asa jeńil salmaqta One Championship promoýsheniniń chempıondyq belbeýin de ıelendi. Ahmetov tek brazılııalyq Andrıano Moraes pen fılıppındik Djehe Eýstakıodan upaı sanymen utyldy. Sońǵy úsh kezdesýinde qazaq sportshysy Ma Hao Bın, Rıs Maklaren jáne De Hvan Kımdi san soqtyrdy.
25 jastaǵy Fılıppın eliniń ókili Dennı Kıngade oktagonǵa 16 márte shyǵyp, 14 ret jeńis toıyn toılady. Ol sonyń tek úsheýinde ǵana oqarsylastaryn oısyrata utty. Kezinde UFC-de óner kórsetip, san márte chempıondyq ataqty ıelengen Demetrıýs Djonsonmen kúsh synasyp, dańqy alysqa jaıylǵan AQSh sportshysyna upaı sanymen ǵana ese jibergen edi.