Aýyl sharýashylyǵy salasyndaǵy kásipke burynǵydaı asta-tók ınvestısııa quıý qazir azaıǵan. Bıyl 9 aıdaǵy kórsetkishti zerdeler bolsaq osyǵan kóz jetkizemiz. Qańtardan qyrkúıekke deıingi aralyqta aýyldyq jerlerdegi negizgi kapıtalǵa 3,9 trln teńge ınvestısııa salynypty. Bul bir jyl burynǵy derekten 12,4 paıyzǵa tómen.
О́ńirlik bólinis boıynsha ınvestısııanyń basym bóligi Atyraý oblysyna (40,1 paıyz) tıesili eken. Atalǵan óńirge 1,6 trln teńge kóleminde ınvestısııa quıylǵan. Osynyń ózi byltyrǵy kórsetkishten 28,5 paıyzǵa az dep habarlaıdy Finprom. Úzdik úshtikke Aqtóbe (311,7 mlrd teńge – bir jylda 26,1 paıyzǵa kóp) jáne Almaty (277,1 mlrd teńge – bir jylda 1,8 paıyzǵa kóp) oblystary da kiredi. Eń tómengi kórsetkish Pavlodar oblysynda – 96,3 mlrd teńge. Bir jyl burynǵy derekten 33,5 paıyzǵa azaıyp ketken.
Al bólingen ınvestısııany jan basyna shaǵar bolsaq, ár aýyl turǵynyna 506,5 myń teńgeden keledi eken. Bul jaǵynan da Atyraý oblysy kósh bastaıdy. Adam basyna 5,2 mln teńgeden. TOP-3-ke Aqtóbe (1,2 mln teńge) jáne Batys Qazaqstan oblystary (598 myń teńge) engen. Eń tómengi kórsetkish Túrkistan oblysynda – jan basyna shaqqanda 100,8 myń teńgeden tıesili.
«Aýyldyq jerlerdegi kapıtaldyq ınvestısııanyń 80,8 paıyzy kásiporyndardyń jeke qarajaty esebinen qamtamasyz etilgen – 3,2 trln teńge. Jyldyq qysqarý 14,1 paıyzǵa jetken. Taǵy 367,6 mlrd teńgeni banktik emes uıymdar usynǵan. Respýblıkalyq bıýdjetten 142,9 mlrd teńge bólindi (-19,5 paıyz bir jylda). Jergilikti bıýdjetten 172,3 mlrd teńge (-20 paıyz bir jylda) bólindi. Taǵy 71 mlrd teńge banktik nesıeler esebinen quraldy. Bul turǵydan bir jylda 40 paıyzǵa ósim bar. Salymnyń negizgi bóligi bıyl qurylys jáne nysandardy kúrdeli jóndeýden ótkizýge jumsaldy. Onyń mólsheri 1,9 trln teńgeni quraıdy. 877,2 mlrd teńgege mashına, qurylǵy jáne transporttyq quraldar satyp alyndy» dep jazady Finprom.
Úkimettiń resmı saıtynyń habarlaýynsha, aýyldyq eldi mekenderdi damytý maqsatynda elde turǵyn úıdi qaıta jańartý jáne onyń qurylysy, agroónerkásiptik keshendi damytý, shaǵyn jáne orta kásipkerlikti qoldaý, ınfraqurylymǵa ınvestısııa salý boıynsha sharalar atqarylyp jatyr. 2019-2020 jyldary qazirgi baǵdarlamalar aıasynda 618 mlrd teńgege 12 myńnan astam joba júzege asyrylǵan. Aldaǵy 4 jylda «Aýyl – el besigi» jobasyn qarjylandyrý kólemi 800 mlrd teńgege deıin ulǵaıtylmaq. Sondaı-aq barlyq qarjylandyrý kózderin esepke ala otyryp aýyldardy jańǵyrtýǵa 1,3 trln teńge qarjy bólý josparlanǵan.
Qazir bizde baǵanyń sharyqtap turǵany belgili. Osy oraıda aýyl sharýashylyǵy el ekonomıkasynyń draıverine aınalyp, jetekshi pozısııada júrýi kerek edi. Alaıda bul sektordyń damý qarqyny da, berer ónimi de kóńil kónshitpeıdi. Bul turǵyda el basshylyǵy Qazaqstannyń aýyl sharýashylyq áleýetin durys paıdalana almaı otyr. Saladaǵy jalaqynyń tómendigi de jumys sapasyna teris áser etetini belgili. Azyq-túlik qaýipsizdigin tikeleı qamtamasyz etýge qabiletti agroónerkásip kesheni qazir eldegi eń az jalaqy tólenetin sala qatarynda. Aýyl, orman jáne balyq sharýashylyǵy salasyndaǵy ortasha aılyq jalaqy kólemi – 167,5 myń teńge. О́simdik, mal ósirý, ańshylyq salasyndaǵy jalaqy budan da tómen – 167,1 myń teńge. Sektordaǵy satyp alý qabileti 7,7 paıyzǵa ósken. Al balyq aýlaý jáne akvamádenıet salasynda jumys isteıtinderdiń ortasha aılyq jalaqysy 85,7 myń teńge eken.