Bul jaıynda QR IIM resmı ókili Nurdildá Oraz málim etti, dep habarlaıdy Egemen.kz.
«Bir apta ishinde 2 936 qylmys jasaldy. Onyń 2 012-si táýlik ishinde ashyldy. Polısııa qyzmetkerleri «izin sýytpaı» 8 kisi óltirýdi, 6 ólimge ákep soqqan densaýlyqqa qasaqana aýyr zııan keltirýdi, 4 qaraqshylyq, 32 tonaý jáne 427 bóten múlikti urlaý qylmystaryn ashty», dedi resmı ókil IIM baspasóz alańynda ótken brıfıngide.
Sonymen qatar ol Ystanbulda Halyqaralyq qylmystyq polısııa uıymynyń Bas assambleıasy – Interpoldyń 89-shy sessııasy ótkenin, oǵan Ishki ister mınıstri Erlan Turǵymbaev bastaǵan qazaqstandyq delegasııa da qatysqanyn atap ótti.
«Assambleıaǵa 160 eldiń ókilderi, sondaı-aq Interpoldyń ulttyq ortalyq bıýrosy, onyń ishinde Qazaqstan men BUU, DSU sııaqty birneshe halyqaralyq uıymdardyń basshylary, Ortalyq Amerıka, Meksıka jáne Karıb óńiri polısııa basshylarynyń komıssııasy jáne taǵy basqalary bas qosty. Interpol jahandyq qaýipsizdikti qamtamasyz etýde mańyzdy ról atqarady. Bul uıym jalpy qylmysqa qarsy kúres salasynda qatysýshy elderdiń ulttyq quqyq qorǵaý organdarynyń kúsh-jigerin biriktirý salasynda keń múmkindikter ashady», dedi Nurdildá Oraz.