Qazaqstan Respýblıkasynyń Germanııa Federatıvtik Respýblıkasyndaǵy Elshiligi konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń qoldaýymen uıymdastyrylǵan beınekonferensııa formatyndaǵy is-sharaǵa qatysty. Munda «Beıbitshilik pen kelisim úshin konfessııaaralyq dıalog» atty dóńgelek ústel otyrysy ótti, dep habarlaıdy Egemen.kz.
Pikirtalastarǵa QR Aqparat jáne qoǵamdyq damý mınıstrligi Din isteri komıteti tóraǵasynyń orynbasary Baýyrjan Bákirov, Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń Basqarma Tóraǵasy Bolat Sársenbaev, QR Parlamenti Senaty janyndaǵy senatorlar Keńesiniń múshesi, «Mádenıet arqyly álem» Halyqaralyq qaýymdastyǵynyń prezıdenti Tólegen Muhamedjanov, GFR syrtqy ister mınıstrliginiń Din isteri jónindegi halyqaralyq saıasat bóliminiń basshysy Ebba Shol, «Ǵylym jáne saıasat qory» nemis taldaý ortalyǵynyń aǵa ǵylymı qyzmetkeri Sabına Rıdel, sondaı-aq sarapshylar, jýrnalıster, QR jáne GFR úkimettik emes qurylymdarynyń ókilderi, qoǵam qaıratkerleri qatysty. О́z sózinde Qazaqstannyń Germanııadaǵy Elshisi Dáýren Sháripov Qazaqstandaǵy etnosaralyq jáne konfessııaaralyq toleranttylyq dástúrleri týraly aıtyp, azamattardyń dinı bostandyqtaryn saqtaýdy qamtamasyz etý boıynsha memlekettiń turaqty jumysynyń negizgi baǵyttaryn túsindirdi.
«Elimizdegi barlyq salada júrgizilgen jáne júrgizilip jatqan reformalar qoǵamdy túbegeıli ózgertti. Biz óz Táýelsizdigimizdiń 30 jyldyǵyn qýatty memleket jáne birtutas halyq retinde atap ótýdemiz. Osy ýaqyt ishinde bizdiń respýblıkamyz saıası jáne áleýmettik-ekonomıkalyq damýdy bastan ótkerdi. Sondaı-aq óziniń baı rýhanı-mádenı murasyn jandandyrýda eleýli tabystarǵa qol jetkizdi», dedi dıplomat.
О́z kezeginde, N. Nazarbaev Ortalyǵynyń Basqarma Tóraǵasy Bolat Sársenbaev 2003 jyldan beri ótkizilip kele jatqan mańyzdy jáne bedeldi alań – Álemdik jáne dástúrli dinder kóshbasshylarynyń sezin, onyń ishinde nemis dinı qaýymdary ókilderiniń qatysýymen ótkizgen Qazaqstan men álem boıynsha konfessııaaralyq dıalogty nyǵaıtýdaǵy Elbasy N.Nazarbaevtyń rólin erekshe atap ótti.
«Qazaqstan rýhanı dıplomatııa qaǵıdattaryn jańǵyrtý men damytýǵa baǵyt alyp, halyqaralyq arenada óz ustanymyn nyq bekitti. Onyń jarqyn dáleli Qazaqstan Respýblıkasynyń Tuńǵysh Prezıdenti – Elbasy N. Nazarbaevtyń jahandyq bastamalary boldy. Ondaı aýqymdy jobalar eldiń tanymaldyǵyn arttyryp qana qoımaı, álemdik qoǵamdastyqtyń jańa múshesi retinde Qazaqstanǵa degen senimniń irgetasyn qalady. Sonymen qatar óńirlik jáne jahandyq turaqtylyqty nyǵaıtýǵa, álemde konfessııaaralyq jáne dinaralyq dıalogty ilgeriletýge eleýli úles qosty», dedi Ortalyqtyń Basqarma Tóraǵasy.
Elimizdiń dinı senim bostandyǵyn qamtamasyz etýge baǵyttalǵan memlekettik saıasatynyń arqasynda Qazaqstan búginde 18 konfessııa men 100-den astam etnos atynan ókildik etetin 3800-den astam dinı birlestik úshin qaýipsiz ári jaıly úı bolyp tabylatynyn atap ótken jón.
Is-sharanyń jalǵasy retinde shaqyrylǵan sarapshylar ulttyq biregeılik, dinaralyq jáne mádenıetaralyq qatynastar sııaqty taqyryptar boıynsha pikir almasty, sondaı-aq Germanııadaǵy memlekettik-shirkeý qatynastarynyń tarıhyn qazirgi qazaqstandyq qoǵamdaǵy jáne basqa elderdegi damý modelderimen salystyrdy.
Atap aıtqanda, professor S.Rıdel men shyǵys eýropalyq jáne halyqaralyq zertteýler nemis ortalyǵynyń ǵylymı qyzmetkeri B. Eshment Qazaqstannyń túrli etnodinı toptary arasynda berik jalpy qazaqstandyq biregeılikti qalyptastyrý úshin memlekettiń zaıyrly sıpatyna, dinı uıymdardyń qarjylyq táýelsizdigine, ózara qurmetke, plıýralızmge jáne tózimdilikke negizdelgen konfessııaaralyq jáne etnosaralyq dıalogtyń mańyzdylyǵyna qatysty ortaq pikirge keldi.
«Dinge baılanysty máseleler árkimniń jeke isi retinde qaralǵanymen, túrli etnostardyń ókilderi ózderin qazaqstandyqtar retinde sezinýde», dep B.Eshment óziniń taıaýdaǵy zertteýiniń nátıjelerin qorytyndylady.
Esterińizge sala keteıik, dóńgelek ústel Qazaqstan basshylyǵynyń Álemdik jáne dástúrli dinder lıderleri seziniń maqsattaryn ilgeriletý jónindegi bastamalaryn qoldaý turǵysynda uıymdastyryldy. 2022 jylǵy 14-15 qyrkúıekte Nur-Sultan qalasynda «Pandemııadan keıingi kezeńde adamzattyń áleýmettik-rýhanı damýyndaǵy álemdik jáne dástúrli konfessııalar kóshbasshylarynyń róli» taqyrybyndaǵy sezdiń aldaǵy VII otyrysy ótedi.