Pavlodar aýdandyq soty aıyptalýshyny áıelin qasaqana órtep jibergeni úshin kináli dep tanyp, 8 jylǵa bas bostandyǵynan aıyrdy, dep habarlaıdy Egemen.kz.
Is materıaldaryna sáıkes, oqıǵa bıyl tamyzda bolǵan. Rozovka aýylynda otbasylyq janjal kezinde er adam tońazytqyshtan ishimdik alyp, áıeliniń ústine shashyp, ottyqpen órtep jibergen. Erli-zaıypty arasyndaǵy kıkiljiń áıeli kúıeýine mas kúıde kólik júrgizýge tyıym salǵan soń týyndaǵan. 34 jastaǵy jábirlenýshi jansaqtaý bólimine túsip, keıin qaıtys boldy.
«Sottalýshy adam ólimine ákep soqtyrǵan densaýlyqqa qasaqana aýyr zııan keltirgeni úshin kináli dep tanyldy. Ol 8 jylǵa bas bostandyǵynan aıyryldy», dedi Pavlodar oblystyq sotynyń baspasóz qyzmeti ókilderi.
Sot otyrysynda er adam óz kinásin tolyq moıyndap, oqıǵaǵa qatysty óz nusqasyn aıtty. Onyń aıtýynsha, áıelimen janjaldasyp qalǵannan keıin tatýlasyp, as úıde salattar daıyndaýǵa kirisken. Bankalardy zararsyzdandyrý úshin spırtpen súrtýdi usynyp, ol úshin tońazytqyshtan bir bótelke alkogoldi alyp, ústeldiń ústine ashyq qaldyrǵan. Bótelke keıinirek qulap, onyń jáne jubaıynyń ústine tógilgen. Er adamnyń aıtýynsha, keıin ol áıelinen adam qalaı janatynyn kórgisi kele me dep surap, ázildep ózin órtep jibergen. Qolyndaǵy otty sóndire bastaǵanda, ushqyndar edenge túsip, keıin jalyn áıeline taraǵan. Ol áıeliniń ústine sý quıyp, jedel járdem shaqyrǵan.
Sot aıyptalýshynyń bergen jaýabyna kúdikpen qarady.
Aıta keteıik, jábirlenýshi tarap aıyptalýshyǵa eń tómengi merzim berýdi talap etken.
«Sot jazany jeńildetetin mán-jaı retinde kinásin moıyndaý, shyn júrekten ókiný, tergeýge belsendi kómek kórsetý, sottylyǵynyń joqtyǵy jáne eki kishkentaı balanyń bolýyn eskerdi», dedi sottyń baspasóz qyzmeti.
Eske salaıyq, oqıǵadan keıin birden polısııa qyzmetkerleri densaýlyqqa qasaqana zııan keltirý deregi boıynsha sotaldy tergeýdi bastap, keıin is asa aýyr bapqa aýystyrylyp, kúdikti qamaýǵa alynǵan bolatyn.