Memleket basshysy Dúnıejúzilik saýda uıymynyń bas dırektory Ngozı Okondjo-Ivealamen kezdesý ótkizdi, dep habarlaıdy Egemen.kz Aqordaǵa silteme jasap.
Kezdesý barysynda Qazaqstan men Dúnıejúzilik saýda uıymy arasyndaǵy yntymaqtastyqtyń perspektıvalary, onyń ishinde DSU-ǵa múshe elder mınıstrleriniń 12-konferensııasyna elimizdiń tóraǵalyq etý máselesi talqylandy. Sondaı-aq halyqaralyq saýdany damytýdyń ózekti máseleleri jóninde pikirler ortaǵa salyndy.
26 qarashada DSU Uıymǵa múshe memleketter mınıstrleriniń 12-konferensııasynyń ótetin ýaqytyn keıinge shegerý jóninde málimdeme jasady. Jıyn 30 qarasha men 3 jeltoqsan aralyǵynda Jenevada ótýge tıis edi.
Ngozı Okondjo-Iveala indettiń órshýine baılanysty mınıstrler konferensııasyn keıinge shegerýge týra kelgeni ókinishti jaıt ekenin jáne onyń óte aýyr sheshim bolǵanyn aıtty. Kezdesýge qatysýshylar is-sharany ótkizýdiń yqtımal jańa merzimderin talqylady.
Prezıdent DSU-men aradaǵy yntymaqtastyqtyń mańyzdylyǵy týraly aıta kele, pandemııa jaǵdaıynda Uıymnyń álemdik ekonomıkany qaıta qalpyna keltirý isindegi negizgi róline nazar aýdardy.
Qasym-Jomart Toqaev Ngozı Okondjo-Ivealanyń basshylyǵymen vaksınanyń barlyq adamǵa birdeı teń dárejede qoljetimdiligin qamtamasyz etý úshin DSU-ǵa múshe memlekettermen, negizgi halyqaralyq uıymdarmen jáne vaksına óndirýshilermen júrgizilip jatqan konstrýktıvti dıalogqa qoldaý bildirdi.
Áńgimelesý barysynda 2022 jyldyń qarasha aıyna josparlanyp otyrǵan Qazaqstannyń Dúnıejúzilik saýda uıymyndaǵy saýda saıasatyna alǵashqy sholýynyń shyǵarylymy talqylandy. Prezıdent elimiz úshin osy oqıǵanyń asa mańyzdy ekenin atap ótti.
Memleket basshysy Qazaqstannyń DSU qaǵıdalary men erejelerine, sondaı-aq osy uıymǵa kirgen kezde ózine júktelgen mindetterge beıildiligin rastaı alatynyna senim bildirdi.
Kezdesý sońynda Qasym-Jomart Toqaev Ngozı Okondjo-Ivealany Qazaqstanǵa saparmen kelýge shaqyrdy.