Keshe Qazaqstan Respýblıkasy Parlamenti Senaty Tóraǵasynyń orynbasary Asqar Beısenbaev Astanaǵa resmı saparmen kelgen Fınlıandııa Respýblıkasy Parlamentiniń Tóraǵasy Eero Heınıalýomamen kezdesti, dep habarlady Senattyń baspasóz qyzmeti.
Kezdesý barysynda Qazaqstan – Fınlıandııa yntymaqtastyǵynyń jáne parlamentaralyq baılanystardyń aýqymdy máseleleri talqylandy. A.Beısenbaev atap ótkendeı, Qazaqstan Parlamentiniń depýtattary fın áriptesterimen ekijaqty yntymaqtastyqty nyǵaıtýǵa, sondaı-aq, halyqaralyq parlamenttik uıym aıasyndaǵy baılanystardy damytýǵa múddeli.
Qazaqstan elimizdiń ekonomıkasyn ártaraptandyrý jáne ǵylymı negizdelgen, joǵary tehnologııalyq óndiristerdi damytý jónindegi jobalardy iske asyrýǵa fın bıznesiniń belsendi qatysýyna múddeli. Senat Tóraǵasynyń orynbasary Astanada ótetin EKSPO-2017 halyqaralyq kórmesine fın kompanııalaryn shaqyrdy.
E.Heınıalýoma Fınlıandııa syrtqy saıasatyndaǵy Qazaqstannyń mańyzdy róline nazar aýdardy jáne oǵan jıi bolatyn joǵary deńgeıdegi saparlardyń dálel ekenin atap ótti. Meıman atap ótkendeı, ol Astanaǵa parlamentaralyq baılanystardy nyǵaıtý jáne isker baılanystardy keńeıtý maqsatynda kelgen bolatyn. Kezdesý barysynda ol jańartylatyn energııa kózderi tehnologııalaryn engizýdegi Fınlıandııa tájirıbesi týraly jáne qazirgi kezde óz elindegi tutynylatyn energııanyń 40 paıyzy bolatyny jaıynda áńgimeledi.
Fınlıandııa Parlamentiniń Tóraǵasy «Qazaqstan-2050» Strategııasynda alǵa qoıylǵan damýdyń bıik maqsattary basqa elderge ónege ekenin atap ótti.