Eńbek jáne halyqty áleýmettik qorǵaý mınıstrligi «Altyn alqa» jáne «Kúmis alqa» alqalarymen marapattalǵan kópbalaly analarǵa memlekettik járdemaqy taǵaıyndaý boıynsha qyzmetti proaktıvti formatta alý tártibin jeńildetti, dep jazady Egemen.kz.
Kópbalaly analardyń ýaqytyn únemdeý maqsatynda Eńbek mınıstrligi 2019 jyldan bastap osy járdemaqyny taǵaıyndaý boıynsha memlekettik qyzmetti proaktıvti formatta alýǵa múmkindik beredi.
«Olar memlekettik qyzmetterdi kez kelgen yńǵaıly ýaqytta jáne kez kelgen jerde ala alady. Kórsetiletin qyzmetti alýshy bir ǵana SMS-habarlamaǵa jaýap bere otyryp, járdemaqyny proaktıvti resimdeýge kelisim beredi jáne bank shotyn rastaıdy. Memlekettik qyzmet kórsetý úshin qajetti basqa da málimetter memlekettik organdardyń aqparattyq júıelerinen túsedi», dedi Eńbek jáne halyqty áleýmettik qorǵaý vıse-mınıstri Erbol Ospanov.
Jeńildetilgen tártip memlekettik járdemaqyny proaktıvti formatta taǵaıyndaýdy aıtarlyqtaı arttyrýǵa múmkindik berdi. Osy ózgeristerdiń arqasynda 2021 jyly proaktıvti qyzmet alǵan kópbalaly analardyń sany eki eseden astam – 9 myń adamǵa deıin ósti.