Elordadaǵy «Kóktal-1» jáne «Promyshlennyı» turǵyn alabynda ornalasqan eki birdeı kóp páterli turǵyn úı kesheniniń turǵyndary kógildir otynmen qamtamasyz etildi, dep habarlaıdy Egemen.kz.
El astanasyn gazdandyrý Elbasynyń aýqymdy jobasy ekeni barshaǵa málim. Eldiń ıgiligine arnalǵan joba Memleket basshysynyń nazarynan tys qalǵan emes.
«Nur-Sultan qalasynyń ákimdigi 2019 jyldyń qyrkúıeginen bastap elorda aýmaǵynda gazben jabdyqtaý jelilerin salý boıynsha óte úlken jobany júzege asyrýda. Eki jyldan astam ýaqyt ótti. Osy kezeńde qalada 650 shaqyrym gaz taratý jelileri salyndy. Búgingi tańda 9 turǵyn úı alabyn qosýǵa qoljetimdilik qamtamasyz etilgen, ıaǵnı 14 myńǵa jýyq abonent gazǵa qol jetkize alady. Búginde alǵashqy eki turǵyn úı kesheni gazǵa kóshirildi. Birinshi úı «Kóktal-1», ekinshi úı «Promyshlennyı» turǵyn alabynda ornalasqan. Bul aıtarlyqtaı úlken úıler, bireýinde shamamen 70, ekinshisinde – 190 páter bar. Tutynýdyń alǵashqy kezeńinde turǵyndardyń burynǵy tólemaqysymen salystyrǵanda 3 eseden astam únemdeý baıqalady. Olar gazǵa kóshýdiń jaılylyǵyn sezindi», dedi Nur-Sultan qalasynyń otyn-energetıkalyq kesheni jáne kommýnaldyq sharýashylyq basqarmasynyń bólim basshysy Maqsat Esmaǵulov.
Kógildir otynmen qamtylǵan turǵyn úı keshenderi biriniń qurylysyn júrgizgen kompanııanyń ókili Oksana Resnovanyń aıtýynsha, úıge gaz jetkizýge esh kedergi joq. «Bul úı tabıǵı gazǵa qosylǵan. Sonyń arqasynda biz gaz jetkizý máselesin sheshtik, bizde jospardan keshigý syndy problemalar joq, aldaǵy ýaqytta da solaı bolady dep úmittenemiz. Kezinde bizdiń úıdi tabıǵı gazǵa qosýǵa bastamashy bolǵan qalamyzdyń ákimdigine úlken rahmet. Búgingi tańda bul biz úshin óte úlken jeńildik», dep túsindirdi O.Resnova.
Turǵyn úı keshenderiniń turǵyndary gazǵa kóshýdiń artyqshylyqtaryn baǵalady. Maıra Nuralıeva MTK-da alty aıdan beri turyp jatyr. Onyń aıtýynsha, úı óte jyly, barlyq jylý júıesi zamanaýı standarttarǵa saı jabdyqtalǵan.
«Úı óte jyly. Bizge gaz júrgizip bergeni jaqsy boldy», dep pikirin bildirdi kóp páterli turǵyn úı kesheniniń taǵy bir turǵyny Ahat Tolymhan.
Esterińizge sala keteıik, búginde Almaty men Saryarqa aýdandary gazdandyryldy. Gaz taratý jelileri 9 turǵyn alaptarynda júrgizildi. Olar: «Kóktal-1», «Kóktal-2», «Jeleznodorojnyı», «Promyshlennyı», «Agroqalashyq», «Ońtústik-Shyǵys», «Internasıonalnyı», «Mıchýrıno», «Kúıgenjar». «Qazaqaýyl», «Aqbıdaı» shaǵyn aýdandary. Sondaı-aq qalanyń Potanın kóshesiniń eski bóliginde gaz qosý úshin iske qosý-jóndeý jumystary jalǵasýda.