Aqtóbede vahtalyq ádispen jumys isteıtin munaıshylar mingen kólik aýdarylyp qaldy. Birneshe adam aýrýhanaǵa tústi, dep habarlaıdy Egemen.kz.
Oqıǵa 10 jeltoqsan kúni saǵat 17:30-da tirkelgen. Munaı óndiretin kompanııalardyń birine tıesili «KamAZ-21099» avtokóliginiń 60 jastaǵy júrgizýshisi ken ornynan shyǵyp, Temir aýdany, Keńqııaq kentine baǵyt alǵan. Júrgizýshi jolda rýlge ıe bola almaı, kólik aýdarylyp qalǵan.
«Jol apaty saldarynan kólik júrgizýshisi men túrli dene jaraqatyn alǵan 6 jolaýshy Keńqııaq aýyldyq aýrýhanasyna jetkizildi. Oblystyq polısııa departamenti kólik júrgizýshilerin jol erejelerin qatań saqtaýǵa shaqyrady», dep habarlady oblystyq PD baspasóz qyzmetiniń jetekshisi Erbolat Sarqulov.
Keńqııaq aýyldyq aýrýhanasy qyzmetkeriniń málimetine súıensek, báriniń jaǵdaıy jaqsy.