Júregi jurtym dep soqqan talaı marǵasqanyń jan álemine muz búrkigen Jeltoqsan oqıǵasyna da bıyl 35 jyl toldy. Osy aralyqta táý eter azattyqtyń tamyrshysy bolǵan oqıǵa jaıly san túrli áńgimeler júz qubylǵan derektermen túrli jınaqtardyń betterin toltyryp jatty. Endi mine, táýelsizdiktiń 30 jyldyq torqaly toıy aıasynda QR Parlamenti Májilisiniń depýtaty, «Qazaq tili» qoǵamynyń prezıdenti Berik Ábdiǵalıdiń bastamasymen arhıv qujattaryna negizdelgen jańa jınaq oqyrmanǵa jol tartty, dep habarlaıdy Egemen.kz.
Jańa kitaptyń tanystyrylymyna QR Parlamenti Májilisiniń depýtattary, tarıhshylar men qoǵam qaıratkerleri qatysty.
«Aınalaıyn azattyqqa qol jetken shaqta bizdiń býyn jigit jasyna kelgen bolatyn. Al Jeltoqsan jańǵyryǵy estilgen shaqta bar bolǵany bozbala edik. Namysy almas qylyshtyń júzindeı ótkir azamattardyń qaısarlyǵy bizdiń jigerimizdi janydy. Olardyń minezi, qaısarlyǵy qaı kezde de bizge úlgi. Azattyq jolynda qurban bolǵan azamattarǵa degen taǵzym men qurmet tolastamaýy tıis.
Táýelsizdik jolynda janyn qııýǵa ázir bolǵan azamattarǵa biz baǵasyn laıyqty bere almaı otyrmyz. Táýelsizdik dáýirinde eń birinshi qurmet sol azamattarǵa kórsetilse deımiz. Tereń zerdeleýdi qajet etetin bul taqyryptyń ázirge túbine jetpedi. Mamandar zerttep talaıly taǵdyr ıeleriniń erlikterin dáleldeı tússe degen tilek kókeıde atoı salyp tur», deıdi Berik Ábdiǵalıuly.
Arhıv qujattary negizinde quralǵan, jylnamalyq tarıhtyń kózindeı bolǵan jınaqtyń jaryq kórýine «Altyn qyran» qoǵamdyq qory demeýshilik kórsetken. 1000 danamen shyqqan kitap el tarapynan qyzyǵýshylyq týdyryp jatsa, tırajy arta túspek.
Kitaptyń tanystyrylymy barysynda jınalǵan mártebeli meımandar qundy kitaptyń tarıhty tanytýda zor mańyzǵa ıe ekenin atap ótti. Sondaı-aq olar Jeltoqsan oqıǵasyna ýaqytynda Almatydan ózge qalalardy qosa eseptegende 100 myńǵa jeteqabyl adam ún qatqanyn, solardyń basym kópshiliginiń erligi umyt qalǵanyn tilderine tıek etti. Mereıli data kezinde Qaırat Rysqulbekovten ózge Erbol Sypataev, Lázzat Asanova, Sábıra Muhamedjanovalardyń da esimi erekshe atalýy kerektigin eske saldy.
Is-shara barysynda QR Parlamenti Májilisiniń depýtattary Qazybek Isa, Janarbek Áshimjan, Baqytbek Smaǵul bastaǵan ózge de mártebeli meımandar izgi tilekterin jaýdyrdy.
«Allajar fılmi osydan jıyrma jyl buryn shyqqanda birinshi bolyp baryp kórgen edik. Keıin ol kınonyń úzilip-qıylyp kórsetilgenin baıqadyq. Myna jınaqtaǵy QR-kod arqyly kórýge múmkindik týatyny qýantyp otyr», dedi Janarbek Áshimjan óz sózinde.
Kúlli mańyzdy qujattar toptastyrylǵan jańa jınaq – oqyrman oljasy.