Elordanyń Dostyq úıinde Nur-Sultan qalasynyń Qazaqstan halqy Assambleıasynyń múshelerine, sondaı-aq el Táýelsizdiginiń 30 jyldyǵyna oraı birlik pen kelisimdi nyǵaıtýǵa eleýli úles qosqan qaıyrymdylyq jasaýshylarǵa, belsendilerge qoǵamdyq nagradalardy tapsyrýdyń saltanatty rásimi ótti, dep habarlaıdy Egemen.kz.
Saltanatty ashylý rásiminde Nur-Sultan qalasynyń Ishki saıasat basqarmasynyń basshysy Dáýren Babamuratov qatysýshylardy Táýelsizdiktiń 30 jyldyǵymen quttyqtady.
«Nur-Sultannyń Dostyq úıi Qazaqstan Respýblıkasy Táýelsizdiginiń 30 jyldyǵyna arnalǵan kóptegen jáne mazmundy is-sharalardy ótkizý ortalyǵyna aınaldy. Bıylǵy jyl QR Táýelsizdiginiń 30 jyldyǵyna oraı 30 ıgi is aıasynda turmysy tómen jandarǵa azyq-túlik sebetterin taratýmen bastalǵany jáne oǵan Nur-Sultan QHA tikeleı qatysqany bárimizge málim. Jyl basynan beri 5 myńnan astam sebet taratyldy. Men bul bastamany qoldap, qoldaǵan barlyq demeýshiler men mesenattarǵa úlken alǵysymdy bildirgim keledi», dedi ol.
Rásimge qatysýshylar Qazaqstan Respýblıkasynyń Prezıdenti – Qazaqstan halqy Assambleıasynyń Tóraǵasy Qasym-Jomart Toqaevtyń mereıtoılyq medaldaryn, Qurmet gramotalaryn, Nur-Sultan ákimi Altaı Kólginovtiń, Nur-Sultan ákiminiń orynbasary Ashat Oralovtyń alǵys hattaryn, «Qazaqstan Respýblıkasynyń Táýelsizdigine 30 jyl» merekelik medaldaryn, Qazaqstan halqy Assambleıasynyń «Birlik» qoǵamdyq medaldaryn aldy.
Saltanatty sharaǵa memlekettik organdardyń, qaıyrymdylyq uıymdarynyń, etnomádenı birlestikterdiń ókilderi, qaıyrymdylyq jasaýshylar men mesenattar qatysty.