Brıtanııada pandemııa bastalǵaly vırýsty juqtyrý oqıǵalarynyń rekordtyq sany tirkeldi, dep jazady Egemen.kz.
Pfizer kompanııasy kovıdti emdeýge arnalǵan jańa dári shyǵardy. Eýropa 5-11 jas aralyǵyndaǵy balalarǵa vaksına salýǵa daıyndyq júrgizýde. Ýkraına indetke qatysty shekteýlerdi taǵy úsh aıǵa sozdy.
Eýrokomıssııa basshysy Ýrsýla fon der Lıaıen koronavırýstyń «omıkron» nusqasynyń qańtar aıynda Eýropada basym bolatynyn eskertti. Bul rette ol Eýroodaq elderinde vırýspen kúres júrgizý úshin vaksına jetkilikti ekenin atap ótti.
Aýrýǵa shaldyǵýdyń jańa oqıǵalarynyń sany árbir eki ne úsh kún saıyn eselenip keledi jáne bul úlken kórsetkishter. Ǵalymdardyń aıtýynsha, qańtardyń ortasyna qaraı «omıkron» Eýropada jańa domınantty nusqa bolaýy múmkin.
Dúnıejúzilik densaýlyq saqtaý uıymy (DDSU) koronavırýstyń jańa nusqasynyń álemde úlken qarqynmen taralyp otyrǵanyn eske salýda. «Omıkrondy «juqtyrý oqıǵalary 77 elde rastaldy. Osy arada, AQSh-ta koronavırýs juqtyryp qaıtys bolǵan adamdar sany 800 myńnan asqan – bul álem boıynsha eń joǵary kórsetkish.
«Omıkron» belgileri ózge nusqalarǵa uqsamaıdy. Oksford ýnıversıtetiniń professory Djon Bell «omıkron» belgileriniń koronavırýstyń basqa nusqalarynan erekshelenetinin aıtýda. Onyń sózinshe, vırýstyń bul nusqasyna shaldyqqan adamdardyń bulshyqeti, ásirese arqasy aýyryp, murny biteledi, asqazany qabynyp, ishi ótedi. Mıalgııa, ıaǵnı bulshyqettiń aýyrýy – jańa nusqanyń erekshe belgisi, densaýlyq saqtaý salasynyń qyzmetkerleri munyń sebebin ázirge túsine almaı otyr.
D. Bell «omıkronnyń» belgileri jaıly túsinik bolǵanymen, onyń basqa erekshelikterin áli de anyqtaý qajet ekenin aıtýda.