QR Qarjy mınıstrligi jalǵan shot-faktýralar jasaýmen aınalysqan 8 000-nan astam kúndik fırmalardy anyqtady. Bul týraly májiliste vedomstvo basshysy Erulan Jamaýbaev málimdedi, dep habarlaıdy Egemen.kz.
Erulan Jamaýbaev qashyqtyqtan ákimshilendirýdiń eń tıimdi quraly «Elektrondyq shot-faktýralar» júıesin engizý bolǵanyn habarlady. Onyń aıtýynsha, júıe salyqtardyń jınalýyn jaqsartýǵa, salyqtyq buzýshylyqtarǵa jedel den qoıýǵa jáne jalǵan kásipkerlik belgilerin anyqtaýǵa múmkindik beredi.
«Júıe iske qosylǵan sátten bastap shamamen 800 mln shot-faktýra jazyldy. Ol buzýshylyqtardy qashyqtyqtan anyqtaýǵa jáne buzýshylyqtar týraly habarlamalar shyǵarýǵa múmkindik beredi. Nátıjesinde 550 mlrd teńgeni sýbektiler tekserýge shyqpaı bıýdjetke derbes tóledi», dedi Qarjy mınıstri Erulan Jamaýbaev.
Qarjy mınıstrliginiń basshysy taldaý barysynda jalǵan shot-faktýralardy jazatyn kúndik fırmalar da anyqtalǵanyn aıtty.
«Qazir mundaı salyq tóleýshilerdiń 8 myńnan astamy bar. Bul kompanııalar boıynsha aınalymdar shamamen 2,8 mlrd teńgeni qurady. Qajet bolǵan jaǵdaıda osy kompanııalar boıynsha aqparat qarjy monıtorıngi agenttigine beriledi. Eger qylmystyq komponent bolsa, agenttik qyzmetkerleri tergeý júrgizip, isterdi sotqa beredi», dep qosty vedomstvo basshysy.