Nur-Sultan qalasynyń qoǵamdyq keńesiniń otyrysynda elordany gazdandyrý máselesi qaraldy, dep habarlaıdy Egemen.kz.
Qoǵamdyq keńes múshesi Baýyrjan Smaıylov qalany gazdandyrý jumystaryn synǵa aldy.
«Gazdandyrýǵa qatysty halyqtan shaǵymdar kóp. Gazdandyrýǵa jaýapty «QazTransGazAımaq» kompanııasy úlgermeı jatyr. Búgingi kúni qala boıynsha servıstik qyzmetti tek bir brıgada atqarady. Búkil halyqqa bir ǵana servıstik qyzmet, nege olardyń sanyn kóbeıtpeske?», dedi Baýyrjan Smaıylov.
Bul eskertýlerge basqarma orynbasary Rústem Zakarın jaýap berdi.
«Sońǵy úsh-tórt aıda myńnan astam úıge gaz tartyldy. Gaz jetkizýge ótinimder sany kún saıyn artyp keledi. Budan basqa, elordany gazdandyrýmen «QazTransGazAımaq» kompanııasy emes, «Intergaz Ortalyq Azııa» kompanııasy aınalysady. Úılerge gaz jetkizý - olardyń mindeti. Siz kótergen másele boıynsha biz osy kompanııanyń basshylyǵyna mamandar sanyn arttyrýǵa qatysty hat joldadyq. Siz atap ótken «QazTransGaz Aımaq» kompanııasy – jeke menshik, ol ákimdikke baǵynbaıdy. Servıstik qyzmetterdi kóp jaǵdaıda jeke uıymdar da kórsetedi. Memleket, ákimdik jeke kompanııalardyń jumysyna aralasa almaıdy. Degenmen, biz aýdan ákimdikterimen birlesip bul máseleni qalaı sheshý kerektigin qarastyryp jatyrmyz. О́z jumystaryn jospar boıynsha oryndaıtyn kompanııalar da bar, kerisinshe, jumysy aqsap qalǵan kompanııalar da bar», dedi Rústem Zakarın.