QR Ekologııa, geologııa jáne tabıǵı resýrstar mınıstri Serikqalı Brekeshev О́skemendegi zaýyt tóbesinde paıda bolǵan qyzǵylt tútinge qatysty túsinikteme berdi, dep habarlaıdy Egemen.kz.
Mınıstr saýaldarǵa О́skemennen shuǵyl kelip túsken málimet boıynsha jaýap berdi.
«Búgin saǵat 12.00-de ekologııa departamentine áleýmettik jeli arqyly «TMK» AQ aýmaǵynda yqtımal apat týraly málimet kelip tústi. Jaǵdaıdy anyqtaý úshin ekologııa departamenti saǵat 12.15-te qural-jabdyqtarmen synama alý úshin sanıtarlyq aımaqqa baryp, aýa quramyndaǵy zııandy zattardyń bar-joǵyn tekserdi. Synama qorytyndysy boıynsha hlordyń mólsheri bekitilgen norma sheginen asqany belgili boldy. Kelip túsken aryz boıynsha jospardan tys tekserý bastaldy. Onyń qorytyndysy qosymsha habarlanady», dedi Serikqalı Brekeshev.