Jaqynda ǵana IBO tujyrymy boıynsha jartylaı orta salmaq dárejesinde álem chempıony ataǵyna qol jetkizgen kásipqoı boksshy Danııar Eleýsinovti 2022 jyly úlken jekpe-jekter kútip tur, dep habarlaıdy Egemen.kz.
Bul týraly Olımpıada oıyndarynyń chempıony Danııar Eleýsinovtiń menedjeri Elvıs Krespo málimdedi. Ol óz sózinde Danııardyń sońǵy jekpe-jegine qatysty pikirimen de bólisti.
«Danııar Eleýsinovtiń sońǵy jekpe-jegi maǵan unady. Kóńilimnen shyqty. Ol barlyq raýndta qarsylasynan basym ekenin aıqyn kórsetti. 12 raýnd judyryqtasqany durys boldy dep esepteımin. Nege deseńiz sońǵy eki jylda ol rıngte bar bolǵany 9 raýnd qana ótkizdi. Danııardyń sol qolyndaǵy jaraqaty jazylǵan soń biz ony sharshy alańǵa kóbirek shyǵara bastaımyz. Bir anyǵy 2022 jyly qazaq boksshysyn úlken jekpe-jekter kútip turǵany sózsiz», dep túıindedi menedjer óz oıyn.