Ár adam – týǵan topyraǵynyń jyrshysy. Meıli ol óner salasyna qatysy joq bolsa da, alǵash tabany tıgen jerdi máńgilik bıigindeı baǵalaıdy. Degenmen de sol sulý sezimdi bastan keship qana qoımaı, halyqqa jetkizetin óner ıeleri ekeni daýsyz. Oǵan sizderge usynyp otyrǵan kartına kýálik etedi.
Táýelsiz elimizdiń qaı túkpirine sapar shekseńiz de áıteýir uly estelikterdiń jańǵyryǵyna jolyǵasyz. Babamyz basqan jerdiń shóbi de áldeneden habar beretindeı. Qarańyzshy, belgili sýretshi Qajybek Baımoldınniń «Qatarkól» kartınasy bizdi sol eski zamannyń esteligine qaıta jolyqtyrǵandaı. Bul ásem meken tańǵajaıyp tabıǵatymyzdan syr tartady.
Avtordyń jeke shyǵarmashylyǵyna kóz salsańyz, onyń keskindemeleri árkelki. Qylqalam sheberi birneshe baǵytta eskızder syzyp, shabytyn tolyqtaı synap kórgen syńaıly. Týyndylary abstraktili sýretke jaqyn. Tipti akademııalyq natıýrmorttar men portretter de kezdesedi.
Kartınalarynyń basty taqyryby – týǵan ólkeniń sulýlyǵyn madaqtaý. Ol Baıanaýyl men Býrabaıdyń ásem kórinisterin birneshe ret óz týyndysyna arqaý etken edi. Baqsańyz, aldaryńyzdaǵy shyǵarma sonyń bir bólshegi ǵana.
Jalpy, Býrabaı kýrorty túrli-tústi kólderi bar aımaq sanalady. Olardyń arasynda álem kóz tikken birneshe kól bar. Solardyń biri – Qatarkól kóli. Sýy móldir ári dalaly ólkede ásem ormanymen órilgen jaǵajaıynyń kórinisi kórgen jandy arbap alatyn ǵajaıypqa ıe.
Sýretshi «Qatarkól» kartınasynda boıaýdy iri-iri jalpaq kóldeneń etip jaǵý arqyly kóldiń aıdynyn berse, dál sol sýdyń qasyna boıaýdy uzyn-uzyn ári tik etip jaǵý arqyly ormandy beınelegen. Pishini tórtburyshty sýyq jáne jyly tústermen salynǵan daqtar sý boıyndaǵy tasty jaǵajaı aýmaǵyn kórsetip tur.
Kórkem peızajda tabıǵatty egjeı-tegjeıli ashyp kórsetpeı, dál sol sátte kózge túsip turǵan nárseniń jalpy áserin jetkizgen. Ol bul áserge tústerdi oınatý men boıaýlardy jaǵýdyń erekshe faktýrasy arqyly qol jetkizedi.